盤點10款由日本甜品師選出嘅雪糕 雪見大福+果汁冰球都有入榜！

夏日炎炎，相信大家都會特別鍾意食雪糕去解暑，琳瑯滿目嘅款式同口味，令大家都開始「選擇困難症」發作，唔知點選好！近日，有日本節目就邀請咗當地5位著名嘅甜品師選出10款必食嘅雪糕，等大家可以參考下，唔洗再咁煩惱～而且大部份提及過嘅雪糕喺香港Donki或者其他日本超市都買到㗎！

Photo from 固力果官網

第10位：森永雲呢拿威化批

鬆脆嘅威化餅皮包住雲呢拿雪糕，口味非常夾！再加上，份量夠大又方便大家買完即刻食用，係日本人嘅熱門雪糕之一～據聞，餅皮仲塗上咗一層白巧克力，目的就係為咗防止餅皮因為雪糕而變得唔脆，係非常細心嘅設計。

Photo from 森永日本官網

第9位：森永Pino牛奶朱古力雪糕

雲呢拿雪糕被濃濃嘅朱古力外層包住，再加上裡面嘅雲呢拿雪糕有加埋煉乳，所以令佢嘅牛奶香味更加香濃突出！而雪糕亦被製造成一粒粒，方便入口，唔少人都選擇佢做飯後甜品～

Photo from 森永日本官網

第8位：森永Parm朱古力雪條

呢款雲呢拿雪糕被香口脆皮嘅朱古力外層包住，裡面嘅雪糕仲係經過特別調配，加入咗馬斯卡邦尼芝士，令口感更好。當朱古力同雪糕喺口中融化時，搭配出超高嘅水準！

Photo from 森永廣告

第7位： GariGari君

呢款雪糕被日本人喻為「國民雪糕」，雪糕有兩層嘅構造，外層就比較酥脆，但內層就比較似雪葩嘅口感，非常清爽，係消暑時必定要食嘅雪糕～而且佢仲不時會推出特別嘅口味，例如有玉米濃湯味、鳳梨、蜂蜜檸檬等，不過大家最喜歡嘅都係經典口味可樂同梳打味！

Photo from Pinterest

第6位：樂天雪見大福

相信呢款雪糕，大家都非常熟悉喇～煙韌嘅外皮再配上雲呢嗱味雪糕，非常受歡迎！而且，日本仲偶爾會推出特別口味：牛奶布甸味、綠茶、cream cheese等，係唔少亞洲國家都非常出名～

Photo from 樂天官網

第5位：固力果「Giant Cone朱古力果仁味」

呢個甜筒嘅雲呢拿雪糕上頭有一層巧克力脆皮同埋果仁，令大家食嘅時候口感更加豐富鬆脆！有唔少人就表示最鍾意甜筒底部嘅濃厚朱古力，認為佢係成個雪糕嘅精髓～

Photo from 固力果官網

Photo from 固力果官網

第4位：固力果水果冰球

呢款水果冰球出咗好多唔同嘅水果味，包括有雪梨味、西柚等，利用咗80%嘅果汁去製造，酸酸甜甜嘅口味非常適合夏天食！而佢嘅大小適中，可以俾我哋一口放入口裡面，隨時都可以食用～

Photo from 固力果官網

第3位：井村屋紅豆雪條

呢款紅豆雪條歷史悠久，係日本人心目中嘅傳統人氣雪條。佢嘅質感比較硬，但就非常足料，可以食到粒粒紅豆，而且味道天然，係愛紅豆嘅大家必定要試嘅雪條啊！

Photo from Pinterest

第2位：森永「朱古力Monaka Jumbo」

呢款威化餅雪糕同之前介紹嘅有少少唔同，喺雲呢拿雪糕嘅中間夾住咗朱古力，味道一流！甜品師都話經調配過嘅雪糕比例配搭完美，係呢個產品一直暢銷嘅小秘訣。

Photo from 森永日本官網

第1位：森永MOW雲呢嗱雪糕杯

雪糕採用日本嘅濃縮鮮奶油同牛奶而成，因此佢嘅牛奶味係非常濃郁，口感亦非常香滑。加上價錢便宜，令大家不禁驚嘆可以用呢個價錢享用咁高質素嘅雪糕，係非常值得！有人亦推薦可以喺雪糕曬上即溶咖啡粉，會即刻好似變成食緊Tiramisu咁，別有一番風味～

Photo from 森永廣告

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）