日麵包師公開『滑蛋三文治』食譜+秘訣 3分鐘用微波爐神還原日本味道！

大家呢一陣子都冇得去旅行，相信大家一定好掛住外地嘅美食！最近，有日本節目就教大家整經常都可以喺便利店買到嘅雞蛋沙律三文治，原來做法非常簡單，只需3分鐘就可以完成！大家都不妨可以喺屋企試整下～

Photo from Pinterest

蛋沙律三文治喺唔少人去日本必定會食嘅早餐，相信大家應該都好懷念去旅行嘅時光～最近，日本有位麵包師就公開咗呢種三文治嘅做法，仲傳授咗一種可以輕易咁整出滑蛋嘅方式，等大家喺屋企都可以神還原喺日本食到嘅味道！

Photo from Pinteres

材料：方包1片+雞蛋2隻+沙律醬2匙+少量牛油+少量鹽

首先，將2隻雞蛋發開至蛋漿，之後就將佢放入微波爐用600W叮50秒。叮完之後，蛋漿有一部分已經變成固體，將佢哋壓碎再同其他蛋漿攪拌埋一齊。然後，將蛋再一次放入微波爐叮20秒。取出蛋之後，就可以加兩匙嘅沙律醬同少量鹽（視乎個人口味）作調味。攪拌均勻後，三文治嘅半熟蛋內餡就已經完成喇！

Photo from 日本節目

Photo from 日本節目

麵包方面，將方包對角咁切開一半，然後再輕輕咁喺麵包嘅中間切開少少，記住千祈唔好切到底！喺切開嘅麵包裡面塗上牛油，令三文治嘅香味更加突出，再將蛋沙律放入麵包嘅中間就大功告成喇～

Photo from 日本節目

Photo from 日本節目

日本麵包師仲傳授咗幾個小秘訣，等大家可以輕易咁喺屋企整到。首先，發蛋嘅時候唔好發得太均勻，咁樣先可以達成滑蛋嘅效果。其次，用微波爐整滑蛋最好跟足食譜嘅指示，喺1分20秒內完成，並且分開兩次製作，令成功率增加。

Photo from 日本節目

製造三文治嘅時候，建議用麵包刀切，咁樣可以令麵包冇咁容易變形。如果屋企冇麵包刀，就可以嘗試喺切之前，用熱水先浸一浸把刀。咁樣就可以令切麵包時嘅邊邊位置變得更加完整，令外觀上睇落更漂亮！

Photo from Pinterest

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）