公司由九龍灣搬到上水！員工嫌太遠掀辭職潮！70人走淨10個

搵工嚟講，除咗薪金、待遇、福利之外，有唔少人都會考慮埋上班地點，畢竟交通費都係一筆支出。有網友就分享公司office即將搬去上水之際，有大量員工都辭職遞信，原本有70人嘅公司走淨10人！

公司office地點有某程度上影響咗份工係咪吸引，因為每日返工放工，如果辦公室太遠，唔止需要早啲起身出門以免遲到，車費都會成為固定嘅支出。

日前有網友喺Facebook page「奴工處」分享，近日公司office由九龍灣搬到上水，不過薪金就無調整到。

結果喺搬office前一個月，公司掀起一股「辭職潮」，同事紛紛遞信，全公司70人走淨10個！呢班同事喺疫情下面對難以搵到新工作嘅困難都決定離職，睇嚟返上水真係令唔少人卻步！

有網友笑言，淨返嗰10個員工應該都係住粉嶺上水，亦有住開北區嘅網友表示有興趣：「返緊港島的北區人表示有興趣知係咩公司」

有網民就指上水其實唔係咁遠：「上水認真算係咁，屯天元（屯門天水圍元朗）先係大佬……」、「九龍入新界輕鬆啦！基本上唔會塞車 反工時間放工時間同人地掉轉」

不過亦有網友指其實係公司減省開支嘅方法嚟：「呢招cut人都幾絕」、「一招慳返成百萬遣散費同長期服務金」，又指間公司可能有其他問題存在，搬office只係導火線。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）