27歲男為迎娶47歲網戀新歡堅持與22歲妻子離婚！母子戀修成正果

越南一位27歲男子喺網上結識一名女網友，更為佢不惜同22歲嬌妻離婚，女網友比男子大20歲，但男人無懼外界嘅言論，決意同網戀新歡結婚，成為當地網民討論嘅話題！

成日都話真愛可以跨越一切，包括性別、年齡。喺越南就有一位男子Thien（化名），佢27歲，佢同22歲嘅妻子成婚幾年，喺外界睇嚟佢哋夫妻係合襯嘅一對。

不過隨住時間流逝，Thien漸漸覺得同妻子無乜共同話題，感情變淡，之後佢喺網上結識咗一位女網友。

女網友名為Houng（化名），47歲，雖然兩人年齡相差20年，但「一談如故」，傾得非常投契。佢哋彼此都知道對方真實年齡，但仍無法控制咁互生情愫。

不過Houng就表示知道Thien已婚，唔想破壞人哋家庭，決定同對方維持朋友關係，因為佢亦曾經經歷過一次失敗婚姻，並同前夫育有一位孩子。

Houng指佢開始減少同Thien傾偈嘅次數：「我提出我哋向好朋友方向發展。」，點知無幾耐之後Thien同佢講已經同妻子離婚，最初Houng覺得好自責，但後來慢慢無咗顧慮，就一心一意同Thien戀愛。

Thien同Houng嘅戀情當然不被看好，尤其係男方嘅父母，初頭極為反對佢哋交往，但兩人唔理會他人嘅睇法，堅持呢段感情，最終修成正果，Thien正式迎娶Houng，兩人結成夫婦，亦得到親戚朋友嘅支持、祝福。

Houng表示佢會永遠愛佢嘅丈夫，而Thien就指妻子雖然比佢大20歲，但喺佢心中妻子永遠係最美麗嘅新娘。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）