MIRROR 歌迷直指梁祖堯「為節目效果犧牲fans」？ 私追粉絲追星瘋狂行為令偶像困擾

男子組合MIRROR最近人氣高企，吸粉無數，粉絲年齡層亦變得非常廣泛。日前，播出嘅《調教你MIRROR》就播出咗有fans因為追星到梅窩，而導致拍攝受阻。有粉絲就喺網上反擊表示佢哋當時完全冇影響拍攝，並開始責怪梁祖堯為節目效果將錯推比粉絲！

Photo from 梁祖堯FB

12人男子組合MIRROR人氣不斷飆升，成員們生日嘅時候會大手筆咁為佢哋整巴士燈箱牌，又會設計多種特別應援物品，可見粉絲對佢哋嘅熱愛程度滿瀉！

Photo from Jeremy IG

Photo from Ianchan.HK IG

最近，正在播出嘅《調教你MIRROR》就播出咗粉絲們因為知道MIRROR前往梅窩拍攝，而紛紛去佢哋居住嘅營地附近等待偶像嘅畫面。由節目片段所見，MIRROR一步出營地就被熱情嘅粉絲包圍，一邊用手機近距離咁拍攝佢哋，成員們不禁有啲無奈。

Photo from 《調教你MIRROR》

Photo from 《調教你MIRROR》

梁祖堯就表示節目「本身想拍攝下成員邊行邊傾計嘅畫面，但當被咁多人包圍嘅時候佢哋根本冇可能做返最原本嘅自己」。佢仲表示節目組本身安排嘅戶外寫生、睇牛等活動都因為粉絲太多嘅緣故，而可能需要取消，感到十分可惜！

Photo from 《調教你MIRROR》

Photo from 《調教你MIRROR》

節目後半段，MIRROR成員們亦有分享對於粉絲私追行為嘅睇法。姜濤就話「好感謝粉絲們嘅支持，不過就希望佢哋可以睇場合而作出適當嘅行為，打擾到佢身邊嘅人係佢最唔想嘅」；而Alton同 Tiger就話曾經被跟返屋企同影車牌，生活上或多或少都有受到影響！

Photo from 《調教你MIRROR》

Photo from 《調教你MIRROR》

節目播出後，有當時嘅私追粉絲就喺網上澄清當時佢哋並冇影響到拍攝，亦有跟足工作人員指示保持距離。仲開設咗個新IG專俾MIRROR私追粉絲追蹤，從IG嘅簡介欄就可以睇得出佢哋對梁祖堯嘅不滿！據悉，有粉絲認為梁祖堯專登用攝影機影佢哋大頭，而梁祖堯就曾表示「拍攝時大家一人一部GoPro，難免會拍到粉絲」。

Photo from IG

Photo from 梁祖堯FB

其實早前嘅「姜濤訓斥歌迷」事件，就正正喺拍攝《調教你MIRROR》期間發生。有指當時粉絲人數太多，導致拍攝進度拖後，更加一度要終止拍攝。而姜濤就因為當眾訓斥fans，搞到一班「姜糖」好心痛咁話「我哋捧得紅你，但都可以踩低你。」但有在場粉絲就認為係梁祖堯為節目效果，所以先會刺激姜濤用比較嚴肅嘅語氣，令粉絲同偶像之間關係變差！

Photo from 姜濤IG

Photo from 姜濤IG

其實MIRROR私追粉絲們嘅瘋狂行為已經並非第一次，姜濤就曾經話過有粉絲會上佢屋企敲門，令佢嘅家人同身邊朋友都備受困擾。而其他成員亦曾提及過無論工作到幾夜都會見到粉絲喺拍攝現場外面等待佢哋，令佢哋十分擔心粉絲安危！

Photo from MIRROR FB

Photo from MIRROR FB

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）