TVB新節目《識貨》藝人們大打友情牌向朋友推銷 網民：根本就係屈人俾錢買嘢！

TVB新節目《識貨》呢個星期開始播出，而最新一集就要求各位實習「主播」用電話向佢哋嘅朋友推銷產品，大打友情牌，能夠成功賣出最多嘅就能夠勝出。不過，唔少網民都認為呢個環節根本就係「老屈」其他藝人買嘢，長期賣緊廣告！

Photo from 《識貨》

TVB真人競技節目《識貨》由鄭裕玲（Do姐）、鄭衍峰同孔德賢主持，帶領8位「見習主播」喺完全冇劇本嘅情況下，利用佢哋嘅急才同口才去推銷產品，並且說服現場觀眾購物嘅節目。

Photo from 《識貨》

最新一集嘅主題就係「cold call朋友賣貨挑戰」，要求「主播」們喺限定時間內用電話形式向朋友推銷，大晒友情牌，成功將產品推銷俾朋友先等於成功，而節目最後將會以大家嘅銷售額為準則決定勝出呢個環節！

Photo from 《識貨》

大部份嘅「主播」都選擇打俾圈中好友，誓要令朋友荷包大出血啊～首先，小寶（細細粒）就要推銷罐裝開心果，佢就決定先打俾李亞男，以「你老公要你買啲嘢」為由開始推銷，最終成功說服李亞男購買100罐開心果！之後，佢又再打俾認識咗幾日嘅周嘉洛，亦成功令對方買下100罐開心果同劇組分享。

Photo from 《識貨》

Photo from 《識貨》

黎諾懿就被指定要推銷一盒價值$79蚊嘅面膜，其中佢就打咗俾張秀文、李佳芯、戴祖儀，並成功說服佢哋購買130盒。喺限定時間前，佢就使出殺手鐧打俾老婆，話「老婆我愛你，計你買100盒」，令自己嘅銷售額瞬間飆升！

Photo from 《識貨》

Photo from 《識貨》

不過最厲害嘅就一定係「小明」黃頌明喇～佢要推銷嘅係包濕紙巾，佢分別打俾鄧智堅、泰臣等，仲打俾同樣係對手嘅小寶，但小寶就好豪氣咁買咗800包濕紙巾。最後，小明就致電俾老公，話屋企養貓同烏龜，十分需要用濕紙巾，成功令老公買下1000包濕紙巾，輕鬆贏出比賽！

Photo from 《識貨》

Photo from 《識貨》

唔少網民睇完節目都感到反感！大部份網民都認為呢種推銷方法，簡直就係強迫朋友買嘢，認為「好老屈囉！」；亦有網民唔認同呢種利用交情去推銷嘅方法，再加上買家購買數量太過「離地」，真實性存疑。

Photo from TVB YouTube

Photo from TVB YouTube

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）