鄧麗欣自組排球隊打比賽/陳展鵬曾經入過港隊?! 盤點圈中7位運動健將

歐國盃剛剛開始，而下個月又係東京奧運嘅開幕典禮，唔知又有冇激發到大家做多啲運動呢？！其實娛樂圈中有唔少藝人嘅運動細胞都好強㗎，有啲仲甚至入過香港代表隊！而家就啲下有邊幾位圈中運動健將啦～

Photo from 陳展鵬IG

方力申

現年41歲嘅方力申係一位游泳健將，當時以「香港飛魚王子」嘅稱號入娛樂圈，曾經喺2000年為香港出戰奧運，擁有9項香港游泳紀錄。其中。200米背泳同400米個人混合泳打破香港記錄，並且保持咗21年，直到今年呢2項紀錄先被後輩們打破。

Photo from 方力申IG

Photo from 方力申IG

何雁詩

現時28歲嘅何雁詩係參加節目《超級巨星》而入行，入行前佢係香港高爾夫球代表隊嘅成員，曾代表香港出戰亞運會！雖然入行後比較少接觸高爾夫球，不過喺2018年佢就復出參加香港業餘高爾夫球女子賽，並獲得冠軍嘅好成績！

Photo from 何雁詩IG

Photo from 何雁詩IG

陳卓賢@MIRROR

MIRROR成員陳卓賢（Ian）喺中學時期就已經先後加入排球、田徑及籃球校隊，後來經選拔後加入排球隊。體育細胞好強嘅佢仲曾經連續16屆獲得「香港天主教教區中學聯校運動會」男子全場總冠軍，仲被選為香港男子排球代表隊嘅隊員之一，開始代表香港出戰！佢出道前亦係南華排球隊甲一隊員，不過入行後就正式退役。

Photo from ViuTV

Photo from 陳卓賢IG

鄧麗欣

相信唔少人都知道鄧麗欣十分愛打排球，佢15歲時入選香港青年女排球隊嘅主攻手，直到入行後先冇再打排球。不過，佢對排球嘅熱愛並冇因此而消失，近年仲自組排球隊Loey擔任隊長，多次帶領隊伍出席香港公開賽！

Photo from 鄧麗欣IG

陳展鵬

唔講唔知，原來陳展鵬係前香港乒乓球隊嘅隊員之一！佢曾經喺節目中表示自細就熱愛乒乓球，先被選入香港青年隊，之後再加入港隊。但後來眼見教練中途離開球隊，自己亦無心打落去，就退出咗並入行展開成為歌手嘅路。 最近，喺《明星運動會》中大展球技，為自己嘅隊伍出一分力～

Photo from TVB

Photo from 陳展鵬IG

梁漢文

梁漢文入行前曾入選香港足球代表隊青年軍，然而參加新秀入行後就開始專心喺娛樂圈嘅發展。後來，佢加入咗香港明星足球隊，繼續延續佢對足球嘅愛。直到而家，佢亦偶爾會上傳自己去踢足球嘅照片，對足球十分「專情」！

Photo from 梁漢文IG

Photo from 梁漢文IG

193@ERROR

193身高咁高，絕對適合打籃球！而事實上佢都幾鍾意運動㗎，小學時參加過麥當勞青少年足球計劃；中學就愛上打籃球並成為校隊隊員之一，仲曾經入選南華籃球少年隊！而佢就有喺《ERROR自肥企画》入面大顯身手，令節目幕後團隊驚訝～

Photo from 193 IG

Photo from 193 IG

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）