波蘭「維利奇卡鹽礦」建築物用鹽雕刻而成 超華麗內部裝飾 彷如置身地下王國！

相信大家都好掛住可以出國旅行佢欣賞大自然美景嘅日子，其實好多嘅靚景正正就身處係大自然當中，而家就等我哋為大家介紹一下位於波蘭嘅「維利奇卡鹽礦」啦～佢同大家一向所見嘅鹽礦唔同，係經過悉心嘅設計同裝飾，令唔少遊客都慕名而來㗎～

Photo from IG@wieliczkasaltmine

「維利奇卡鹽礦」係一個位於波蘭克拉科夫附近嘅鹽礦，由13世紀就開始被開採嘅鹽礦，足足用咗700幾年，不過目前已經停止生產。而呢個礦場仲喺1978年被列入教科文組織《世界遺產名錄》當中，係一個非常有歷史價值嘅地方！

Photo from IG@wieliczkasaltmine

而「維利奇卡鹽礦」同其他礦場唔同嘅就係佢嘅內部係有非常華麗嘅裝飾同擺設，令內部嘅環境睇落好似一座王宮一樣！再加上，礦場嘅設計令人有一種高貴典雅嘅感覺，好似身處係時光隧道咁～

Photo from IG@wieliczkasaltmine

整個礦場嘅面積非常大，據悉佢嘅總長度係287公里，共有2,350間房間，甚至深入到地下327公尺深，即係有9層樓咁深！難怪好多人都會稱佢為一個地下王國，仲有去過呢個旅遊勝地嘅遊客表示走遍成個景點，都要花2至3個小時，建議大家一定要上完廁所先參加導覽！

Photo from IG@wieliczkasaltmine

礦場內最吸引人嘅就係位於地底100公尺嘅「聖金加教堂」裡面嘅華麗擺設同景觀，互相配襯，令整個氣氛變得好有中古世紀嘅感覺！而礦場裡面仲有禮拜堂、地下湖泊、餐廳等，可以稱得上係一個小城市啊～

Photo from IG@wieliczkasaltmine

「維利奇卡鹽礦」裡面最特別嘅就係走廊、天花板、地板、牆或建築物都係用鹽雕刻而製成㗎，係好難得一見用鹽所建造嘅建築物！而波蘭政府亦為咗方便遊客去參觀，而將地板修建好，並且加建咗幾條道路。

Photo from IG @wieliczkasaltmine

Photo from IG@wieliczkasaltmine

根據官方所講，雖然大家都可以去鹽礦，但現時景點只會開放2%嘅區域俾大家參觀！如果有一日將全部嘅區域都開放晒，唔知大家又要花幾多時間先可以逛晒成個景點呢～

Photo from IG@wieliczkasaltmine

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）