高海寧自爆好難追 拍拖次數少於5次　不介意男友愛第二個「我有我自信 你有誘惑」

高海寧最近就喺由黎芷珊主持嘅訪談節目《單對單》，大談自己嘅愛情經歷同感情觀。訪問期間，佢表示現時嘅佢好享受單身嘅生活，仲話自己並唔介意另一半鍾意第二個？！

Photo from 高海寧IG

現年34歲嘅高海寧2008年參選香港小姐而入行，曾有份拍攝多部電視劇，仲喺2019年入圍《 萬千星輝頒獎典禮》「最佳女主角」一獎，演技備受肯定！日前，佢就獲邀上黎芷珊嘅訪談節目《單對單》，分享感情經歷同埋愛情觀。

Photo from TVB 娛樂新聞台

平時就已經好識享受生活嘅高海寧，經常都會做瑜珈、整蛋糕等，從而令自己減壓。佢表示自己非常珍惜同享受一個人嘅MeTime，認為「單身冇乜大不了，反而可以睇清楚自己個心，想要啲乜，再遇到更好嘅人」，非常豁達！

Photo from 高海寧IG

Photo from 高海寧IG

當提及愛情觀嘅時候，高海寧就認為而家嘅諗法已經同以前唔同咗。以前嘅佢比較被動謹慎，唔會胡亂開始發展一段關係，因此直到而家拍拖嘅次數都唔多過5次，而最長嘅一次仲足足拍咗8年咁耐！而家嘅佢會變得比較積極，「年紀大咗好難好純粹去鍾意一個人，所以覺得遇到嘅時候唔可以錯過！」

Photo from 高海寧IG

高海寧直言自己好鍾意小朋友，雖然佢暫時並冇任何計畫，不過就覺得生小朋友「自己一個完成都OK㗎」！另外，佢亦話自己應該屬於「難追」嘅對象，因為佢並唔會被任何物質嘅嘢打動到。

Photo from 高海寧IG

佢仲分享咗自己獨特嘅感情觀，話並唔介意另一半愛上第二個：「你覺得佢好過我，It’s OK！我有我自信，你有誘惑、我冇咩？但我會選擇同你一齊，係因為我覺得你重要過其他人。」，睇嚟愛情真係使人盲目～

Photo from 高海寧IG

高海寧自入行以來，緋聞並唔算多。2015年嘅時候，就傳出同音樂才子鄧智偉拍拖，緋聞傳咗足足5年咁多。直到上年，鄧智偉被爆出偷食失婚少婦後，承認同高海寧曾經係戀人關係，仲話兩人已經分手！

Photo from 高海寧IG

Photo from 鄧智偉IG

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）