李佳芯《智能愛人》接檔播放挽救收視！ TVB又籌備真人騷 捧二線藝人上位

TVB《刑偵日記》開播之後，收視率一直都未如理想，上星期仲創新低，只係得10.2點！為咗拯救收視，TVB就打算播放《智能愛人》，靠李佳芯挽救該時段嘅收視率。再加上，兩部劇嘅風格截然不同，希望可以藉此吸引觀眾。

Photo from 李佳芯IG

TVB重頭劇《刑偵日記》由惠英紅、王浩信等人主演，可惜由開播至今收視率一直低迷。隨住劇情發展，收視率竟然一直下滑，上星期只係得10.2點，創下TVB開台53年來電視劇收視嘅新低！據悉電視台高層一度陷入兩難，因為電視劇已經播放到尾聲，所以未能果斷腰斬劇集，只能夠望住收視一直跌。

Photo from 《刑偵日記》

TVB曾經一反常態，喺晚上黃金時段播放綜藝節目，然而全部節目嘅收視都比《刑偵日記》高：《聲夢傳奇》決賽收視錄得23.9點、《明星運動會》有14.3點等。由此可見，《刑偵日記》嘅題材似乎真係同大眾嘅口味有啲出入！

Photo from 《聲夢傳奇》決賽

Photo from 《明星運動會》

TVB想盡辦法救收視，決定接檔播放曾經喺收費電視台播放過嘅《智能愛人》挽救局面！主演之一嘅視后李佳芯（Ali）前年就因為網上言論而遭「雪藏」，不過佢有份演出嘅劇集都開始安排播放出街，可以話係全面「解凍」。

Photo from TVB 《智能愛人》

Photo from 李佳芯IG

雖然唔少人都認為呢個時候播放，好似只係為播放東京奧運攝時間。不過Ali向來都好受觀眾歡迎，可以話係收視率嘅保證，相信應該可以令收視稍為上升返，挽救一下而家低迷嘅局面！

Photo from 《智能愛人》

而且《智能愛人》同《刑偵日記》係完全唔同風格嘅電視劇，前者係屬於科幻喜劇，題材比較輕鬆有趣。而且，TVB高層大讚Ali喺劇中演技大爆發，相信呢套劇應該可以短暫咁為大家帶來新鮮感。日前，李佳芯出席宣傳活動被問到有關收視嘅問題，佢就話「一半一半，始終之前收費台已播過」，而拍檔陸永就更加表示冇信心，靠晒Ali！

Photo from 娛樂新聞台

另外，TVB嘅綜藝節目打算繼續以真人騷為主，有望能夠吸引觀眾。據悉，佢哋正準備新節目《飛越木人巷》，將會發掘二線嘅藝人們，展現自己嘅才能並且進行比賽，最終勝出嘅可以獲得「TVB全能藝人」嘅稱號。其中孔德賢、丁子朗、游嘉欣、港姐郭柏妍等都已經報名參加。

Photo from 丁子朗IG

Photo from 游嘉欣IG

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）