港女返工放lunch睇《多啦A夢》被同事笑！幸獲上司一句力撐！

平時返工放飯，唔少打工仔都會選擇自己坐喺位度煲劇送飯。近日有女網友喺討論區指自己食lunch嘅時候睇《多啦A夢》，點知就被同事笑，令佢內心有啲唔忿氣。

對打工仔嚟講，lunch可以算係全日最放鬆嘅時刻，除咗同同事出去食之外，亦都有人會選擇一邊煲劇、睇綜藝，一邊食飯。

喺Dcard有女網友就以「我啲同事笑我食飯睇多啦a夢..」為題開post，樓主表示自己一直都好中意多啦A夢，細個食飯嗰時會睇，到中學就放學返屋企睇。

樓主強調佢對多啦A夢嘅喜愛係可以連續不停咁重複睇！佢指自己之前lunch嗰陣都係用手機睇，所以好似無咩人知佢中意睇《多啦A夢》送飯。

但最近換咗個比較大嘅mon，於是樓主就用大mon睇《多啦A夢》，點知啲同事見到就笑樓主：「喂乜原來你中意卡通片送飯」

樓主內心唔係好忿氣：「我心諗，你地都真係唔識架喎，多啦A夢真係卡通片代表ok?」，不過好在樓主上司都力撐佢，同佢講：「識貨喎阿妹！多啦A夢好睇！」，令樓主非常安慰，深感公司都仲有「識貨」嘅人。

有唔少網友都表示自己好中意睇卡通片：「我平時食飯都配蠟筆小新」、「終於搵到同好！！我食飯鍾意睇花師奶同小丸子」，指食飯就係要睇啲唔洗用腦嘅卡通。

有網民就指：「食飯做咩都要畀佢哋管，唔係做緊嘢睇，理得佢哋咁多咩」，樓主就表示同事其實都對佢好好，只係會成日笑佢。

討論區嘅網友大部分都會喺食lunch時睇《多啦A夢》、《蠟筆小新》、《我們這一家》，相信食飯睇卡通嘅一定唔止樓主一個。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）