TVB上半年蝕近3億元大讚姚焯菲人氣勁傳曾志偉搵外援將綜藝騷內地化

娛樂新聞

By Cheryl on 26 Aug 2021

Digital Editor

TVB今日公布上半年業績，雖然有增長但淨虧損仍達2.84億元，已較上年同期虧損少3.26%。該中期報告同時點名姚焯菲（Chantel）嘅《戀愛預告》有高點擊率。亦有傳曾志偉搵嚟一名猛料CEO整頓節目製作，但同時被指係節目內地化主因！

Photo from TVB

電視廣播﹙0511，TVB﹚已連續3年蝕錢，雖然今次公佈嘅上半年業績顯示期內收入約12.48億元，按年收入增加2%，但淨虧損仍達2.84億元，同上年同期虧損2.93億元相比，已按年收窄3.26%。

Photo from TVB

同時，該中期報告特別點名早前《聲夢傳奇》吸納大量觀眾收看，決賽達26.5點收視，又指不少觀眾於節目完結後追蹤參賽者嘅社交媒體動態。

Photo from TVB FB

另外，報告指出姚焯菲（Chantel）嘅《戀愛預告》演唱片段喺YouTube 、Facebook、IG及新浪等平台總瀏覽率將近4百萬次。報告同時形容Chantel係「年僅14歲嘅得獎者」，不過決賽當晚都將三大獎項：「專業評審」大獎、「觀眾熱選大獎」及終極大獎頒畀炎明熹（Gigi）。

Photo from 姚焯菲 IG

報告亦提到《聲夢傳奇》第二季正處籌備階段，有廣告商已名言願意贊助節目，同時指會強化同華納唱片、環球唱片、與索尼音樂嘅合作，讓更多歌手出席TVB音樂節目。

Photo from 姚焯菲 IG

除此，早前TVB被大股東黎瑞剛狠批節目製作落後。為咗改善質素，有傳無綫電視副總經理曾志偉搵嚟內地後期製作公司「爆谷傳媒」CEO莫文浩救亡，但同時被指係節目內地化主因。

Photo from TVB

Photo from 爆谷傳媒 FB

莫文浩會考1分，輾轉畢業於城大創意媒體學士課程，2009年畢業後投身電影圈，參與多套電影製作，例如：《志明與春嬌》、《刺陵》、《72家租客》等。之後獲機會為內地綜藝節目進行後期製作，包括：《我們相愛吧》、《燃燒吧！少年》、《王牌對王牌》等。到2015年決定開設後期製作公司「爆谷傳媒」，近期作品包括何超蓮參演嘅《這就是潮流》。