【七公主】盤點10大生活富貴演員！馬海倫晒百萬Hermès袋/林夏薇擁逾15間食店
TVB劇集《七公主》「爆冷」奪《萬千星輝頒獎典禮2021》最佳劇集，令唔少網民都指「係咪課咗金？」原來劇中好多演員如劇名一樣出身富貴、家底豐厚。例如馬海倫就擁有價值過百萬Hermès袋、另外林夏薇老公身家逾20億、仲有富家千金黃翠如、鄺潔楹、陳瀅等！即睇以下10位家境富裕嘅演員！
Photo from TVB
1. 馬海倫晒百萬Hermès袋
現年73歲嘅馬海倫喺TVB做咗多年綠葉，原來佢年輕時曾入選香港保齡球代表隊，代表香港出戰亞洲保齡球錦標賽，佢同老公亦係打保齡球時認識。馬海倫丈夫何世堯為商界人士，曾任1975年至1976年度東華三院董事局總理，其兄係前香港立法會議員何世柱。
Photo from TVB
馬海倫婚後育有一子一女，兒子何存廣任職眼科醫生、女兒何敏晴從事建築行業。佢曾炒樓賺$1,300萬，係圈中隱形富婆，早前佢晒出近照，戴上珍珠頸鏈，珠光寶氣，最搶眼嘅莫過於價值過百萬嘅紫色鱷魚皮併駝鳥皮Hermès Birkin，佢後來表示係子女送畀佢嘅禮物，一家人享受優質生活。
Photo from 馬海倫IG
2. 林夏薇擁逾15間食店
林夏薇大伯林華國（即林峯爸爸）經營房地產生意，有「廈門李嘉誠」之稱，有指林夏薇父親亦有幫手打理。2015年林夏薇與年長佢16年嘅金融才俊莫贊生結婚，據稱佢老公身家達$20億。
Photo from TVB
婚後佢與丈夫居住於太平山頂價值$15億豪宅，林夏薇之後開食店做老闆娘，短短6年已擴張至逾15間分店，成為圈中富婆。
Photo from 林夏薇IG
Photo from 林夏薇IG
3. 黃翠如百億千金
39歲嘅黃翠如爸爸黃永華係上市公司嘅其中一名執行董事兼行政總裁，公司上市當日，黃翠如五姊妹有到港交所見證。
Photo from TVB
黃翠如一家本身住木屋區，喺公司上市後黃翠如曾喺Facebook大讚爸爸由賣魚小販做到地盤工人：「我們為您驕傲，老豆，好叻仔。」。據知黃翠如爸爸身家曾暴脹逾$10億，令佢晉身「億萬千金」！
Photo from 黃翠如IG
4. 陳瀅獨居3,000萬豪宅
千金小姐唔止黃翠如一個！陳瀅自細喺加拿大溫哥華長大，有指佢媽媽第二任丈夫喺內地經營房地產生意，名下更擁有廣州一幢6層樓高商場。
Photo from TVB
陳瀅回流香港後獨居，有報道稱佢自己一個搬入價值$3,000萬嘅豪宅，除咗獨居豪宅，陳瀅亦有名車出入，之前換咗一架過百萬嘅保時捷。
Photo from 陳瀅IG
5. 鄺潔楹富二代手持跑馬地豪宅
29歲嘅鄺潔楹父母係傢俱商人，哥哥從事金融業。雖然佢喺《愛回家之開心速遞》飾演拜金港女「Venus」，但現實中佢與家人住喺大埔2,000呎獨立屋，手持跑馬地豪宅，名下更有一間投資公司。
Photo from TVB
鄺潔楹現時經營個人甜點品牌，佢曾強調自己唔係富婆，不過佢喺出演TVB J2節目《野外步出》時被整蠱，佢二話不說孭起近萬蚊額外拍攝費用，十分豪氣！
Photo from 鄺潔楹IG
6. 謝東閔一家做老闆
35歲嘅謝東閔2010年參加TVB歌唱選秀節目《超級巨聲2》，奪得第四名入行。佢原來家境唔錯，父母都做生意：爸爸經營髮型屋、媽媽開設外傭介紹所。
Photo from TVB
佢畢業後同朋友喺杭州合資經營時裝採購生意，2013年又同屋企人投資6位數字開設沐足店做老闆，有指佢曾用過百萬跑車接載女友朱智賢。
Photo from 謝東閔IG
7. 趙希洛低調豪門千金
38歲嘅趙希洛家境富裕，爸爸趙崇康係澳洲大律師，喺當地擁有多項物業，一家人亦開設咗幾間投資公司。
Photo from TVB
有指佢早年以公司名義購入價值近$6,000萬嘅豪宅，現時巿值逾$8,000萬，係圈中低調富千金。
Photo from 趙希洛IG
8. 吳家樂外父身家豐厚
吳家樂爸爸吳誠傑係商人，喺內地經營貿易行，姐夫則為TVB音樂星夢娛樂集團行政總裁何麗全。
Photo from TVB
佢2006年與其士集團主席周亦卿女兒周蕙蕙結婚，吳家樂外父身家豐厚，有「升降機大王」之稱。
Photo from 吳家樂IG
9. 吳卓衡出身醫護世家
年僅23歲嘅吳卓衡喺《愛回家之開心速遞》飾演「頭皮」，平時劇中不修邊幅，但原來家底唔差！
Photo from TVB
吳卓衡爸爸係急症室顧問醫生，媽媽係註冊護士，依家更開設醫療公司，外公、外婆都係中醫，名符其實嘅醫護世家！佢小學到中學都係就讀於名校男拔萃（拔萃男書院附屬小學及拔萃男書院）。
Photo from 吳卓衡IG
10. 林漪娸富家千金棄家產做演員
61歲嘅林漪娸爸爸經營成衣生意，14歲時已經去英國留學。
Photo from TVB
佢父親90年代喺加拿大經營哥爾夫球生意，林漪娸曾一度聽從爸爸飛去加拿大學習做生意，不過最終因為熱愛演戲，放棄家產，決定回流香港。
Photo from TVB
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
更多相關文章
港姐陳庭欣公開月租十萬九肚山豪宅！由公屋港姐變貴婦 生活越來越富貴
3 Sep 2021
2010年港姐冠軍陳庭欣（Toby）自從同坐擁10億身家嘅楊振源（Benny）拍拖之後，生活就變得越來越富貴！近日就係陳庭欣嘅34歲生日，而佢就上載咗唔少朋友同男友為佢慶祝生日嘅照片，仲公開咗豪宅內嘅環境！
Photo from 陳庭欣IG
#入行後做主持人居多
陳庭欣（Toby）於2010年參選香港小姐獲得冠軍而入行，有份出演電視劇以及主持節目，曝光率都算高。除咗事業順遂之外，佢嘅感情生活都非常多姿多彩。入行後，佢曾經同翟威廉交往5年，不過兩人最終分手收場，但就聲稱兩人變成「Best friend」！
Photo from 陳庭欣IG
#公開戀情！
2018年，陳庭欣被傳媒大爆與彩豐行老闆楊振源（Benny）嘅戀情，後來佢就於IG上載兩人嘅合照正式公開戀情！據悉，作為大老闆嘅楊振源坐擁$10億身家，曾經大手筆投資$1200萬開健身中心，仲邀請女友親自做代言人，一齊搵錢，並揚言兩人預計於今年結婚。
Photo from 陳庭欣IG
Photo from 陳庭欣IG
#豪宅內部曝光
日前，陳庭欣就上載咗好姐妹為佢慶祝生日嘅照片，而照片就曝光咗佢現時居住嘅豪宅內部！據悉，本身與父母同住於九龍灣啟晴邨嘅陳庭欣自從同男友一齊之後，生活變得越來越富貴，仲搬入位於沙田九肚山月租10萬嘅澐灃洋房：面積足足有3,000多平方呎，有4間房同車庫；另設有400平方呎嘅花園以及超過630平方呎嘅天台，十分豪華～
Photo from 陳庭欣IG
由陳庭欣嘅生日照片所見，佢嘅豪宅設計風格主要都係以簡約為主，而飯廳就擺放咗一張大理石嘅圓形餐桌，就算邀請一大班人去屋企開party都唔需要擔心唔夠位置啊！而飯廳嘅後方就有一條樓梯，豪宅空間十分之大～
Photo from 陳庭欣IG
Photo from 陳庭欣IG
#屋內空間大
而平日入得廚房出得廳堂嘅佢亦喺生日當天大顯身手，廚房嘅牆身都係大理石紋理，令整體環境睇落更加乾淨典雅，睇得出廚房嘅設備亦非常齊全，相信佢平時一定有下廚嘅習慣喇！客廳嘅位置亦十分寬敞，即使同朋友玩遊戲大合照都有好多空間～
Photo from 陳庭欣IG
Photo from 陳庭欣IG
Photo from YouTube@「Animore TV 動物踩過界」
陳庭欣曾經喺自己嘅Youtube Channel「Animore TV 動物踩過界」中曝光浴室嘅設計，並主要以白色為主，睇落非常簡潔，就算幫狗狗沖涼都絕對冇問題啊！
Photo from YouTube@「Animore TV 動物踩過界」
Photo from YouTube@「Animore TV 動物踩過界」
#天台景觀開揚
另外，影片中亦都公開咗天台嘅位置，望出去就可以望見清幽嘅山景，而且加上豪宅本身位於較高嘅地方，令佢可以俯視周邊嘅景色！而天台嘅面積亦好大，有好多空間俾狗狗跑步同玩耍。
Photo from YouTube@「Animore TV 動物踩過界」
Photo from YouTube@「Animore TV 動物踩過界」
#傳男友送贈單位？！
陳庭欣同男友交往期間，男方不時都被傳媒爆出同其他女生有曖昧關係，有傳男友楊振源就送咗位於黃大仙現崇山價值逾千萬嘅單位哄陳庭欣。不過對於傳聞，陳庭欣就表示絕對信任男友。睇嚟兩人嘅關係非常穩定，唔知會唔會好事近呢？！
Photo from 陳庭欣IG
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
