日本最強陪酒女櫻井野之花被捕！2年賺14億円 罰款百萬網民嫌太少
櫻井野之花係日本陪酒界嘅傳奇人物，佢擁有超高營業額，又係兩間陪酒俱樂部嘅老闆娘。不過，自疫情爆發，佢生意大受影響，櫻井更開始違法經營，雖然佢賺到14億円（約1億港元），但最終還是被捕，有網民仲嫌佢判刑太輕！
Photo from IG: nonoka199148
櫻井野之花過去因外貌被欺負
32歲嘅櫻井野之花（本名︰渚りえ）兒時曾被同學嘲笑樣貌似猩猩，繼而被欺負，此經歷促使佢進行整形手術及節食，佢更聲稱自己「動刀」次數超過100次，花費超過2000萬日圓（約港幣146萬）！
Photo from IG: nonoka199148
櫻井野之花曾自爆未整形照
櫻井野之花曾於IG自爆約10年前嘅未整形照，同現時對比，改變確實相當大。佢曾揚言要整成石原里美、橋本環奈等女星，但部分網民認為佢已走火入魔。
Photo from Abema News
Photo from IG: nonoka199148
最強陪酒女
畢業後，櫻井成為了一名陪酒女及網紅，經常喺YouTube頻道及社交網宣傳自己兩間陪酒俱樂部。佢又自稱係歌舞伎町連續100個月得到No.1嘅皇牌，更揚言：「做陪酒女係我嘅天職」，所以佢有「最強陪酒女」稱號。
Photo from IG: nonoka199148
被警方發現超時經營
據日媒報道，當地警方於今年1月喺歌舞伎町進行執法行動，並發現櫻井超時經營其風俗店，當時佢被警方警告。櫻井更因此拍片道歉。
Photo from FNN NEWS
2年間賺14億日圓
其後，警方又發現佢未經營業許可，假借他人名義營業。佢對外公佈負責人係另一男士，實情卻係櫻井本人負責經營及接客。佢喺兩年間共賺取14億日圓（約1億港元），最後於5月18日因觸犯風俗營業法被正式拘捕。
Photo from FNN NEWS
假借他人名義營業犯法
喺庭上，法官問櫻井點解要違法營業，佢回應，呢個係歌舞伎町嘅不成文規定：「問十個人，十個都會覺得無許可經營無問題。」而且，佢本來已有超時營業嘅記錄，所以佢認為用其他人名義開店可以省下不必要嘅麻煩。因此，櫻井每月花5萬日圓（約3,500港元）請別人做自家店嘅代表人。
Photo from FNN NEWS
櫻井野之花被判刑
裁判官形容櫻井行為大膽惡劣，又指佢謀取暴利，最後判佢6個月、緩刑3年、罰款100萬日圓（約70,730港元）、和強制徵收約4000萬日圓（約280萬港元）。雖然被罰，但當櫻井在庭上被問以後有無打算繼續喺歌舞伎町工作，佢堅定回答：「我會繼續。」裁判官又告誡櫻井，佢再犯就要履行刑罰，佢表示明白。
Photo from FNN NEWS
有網民認為判刑太輕
雖然櫻井被罰款及判刑半年，但部分網民認為款項對比佢賺嘅錢只係小數目，指其阻嚇性不足，網民又表示，無許可經營代表佢無交稅，咁對其他認真交稅嘅市民嚟講太唔公平。
Photo from FNN NEWS
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
