比卡超唔係老鼠/姆明係精靈！10大卡通角色真身公開！滑嘟嘟係身體器官？！

時事熱話

By Jennifer on 17 Sep 2021

Digital Editor

今晚食乜餸：小二，嚟一碟花生！

好多卡通人氣角色大受歡迎，但就算係fans都未必知道佢哋嘅真正身份，為大家揭開10大角色真身：其實比卡超唔係老鼠、姆明唔係河馬、Ryan都唔係熊！仲有麥當勞角色「滑嘟嘟」到底係咩？！

Photo from Disney

1. Hello Kitty：小女孩

有貓耳、貓鬚、圓鼻，唯獨無口嘅Sanrio人氣角色Hello Kitty喺全球有無數粉絲，佢嘅真身係一位小女孩，亦都因為咁，無嘴嘅小女孩身份令佢嘅外型十分詭異。

Photo from Sanrio

2. 姆明：精靈

嚟自芬留蘭嘅姆明全身白雪雪又圓碌碌，成日都被誤會係白色河馬，雖然個樣好似，但其實佢包含作者希望世界和平嘅願望，係一隻精靈！

3. 《Kakao Friends》Ryan：獅子

Kakao Friends超高人氣嘅Ryan外型極似熊，但實際上佢係一隻無鬃毛嘅獅子，啡色身體同圓豆眼令佢「霸氣盡失」，走可愛路線又難怪會被人誤會。

Photo from Kakao Friends

4. 《寵物小精靈》比卡超：大福＋松鼠

不論細個睇卡通片定係大個睇電影《神探Pikachu》，比卡超形象根本就係一隻「電老鼠」（或者係兔仔），但根據比卡超嘅設計師西田敦子所講，一開始比卡超身體其實係一粒大福，後尾加咗松鼠嘅特徵。

Photo from 《寵物小精靈》

Photo from 《神探Pikachu》

5. 耀西（Yoshi）：烏龜

有玩任天堂遊戲嘅朋友一定識耀西，係Mario嘅坐騎。佢後頸有背棘，所以成日被以為係恐龍，但睇真啲，佢背脊仲有個龜殼，設計稱手塚卓志指佢係「烏龜族」，所以耀西真身係烏龜！

Photo from Nintendo

6. 《海賊王》喬巴：馴鹿

喬巴同樣都係好受歡迎嘅漫畫角色，雖然被誤會係狸貓，但事實上佢係藍鼻子嘅馴鹿醫生。

Photo from 《海賊王》

7. 「POINKO兄」、「POINKO弟」：鸚鵡

經常出現喺meme，其實係日本電信公司docomo嘅吉祥物，個名叫得「POINKO兄」、「POINKO弟」，佢哋當然係兄弟，不過實際上一共有8兄弟，佢哋兩隻就最常出現喺meme，總係有人疑惑佢哋究竟係雞定係鴨，事實上佢哋係鸚鵡（雞尾鸚鵡/玄鳳鸚鵡）！

Photo from docomo

Photo from Facebook

Photo from docomo

8. 多啦A夢：貓型機械人

喺卡通片中多啦A夢成日都會好憤怒咁講：「我唔係狸貓呀！！！！」，真身係貓型機械人嘅多啦A夢之所以經常被誤會都係因為佢圓碌碌嘅大頭。佢本來有一對貓耳但因為瞓覺嗰時被老鼠咬咗，於是就大喊咗一場，令原本係黃色嘅佢掉漆變成藍色，成為今時今日嘅多啦A夢。

Photo from 《多啦A夢》

9. 史迪仔：藍色樹熊

史迪仔係迪士尼人氣角色之一，嚟自外太空嘅626外星生物，原來原型係藍色樹熊！雖然佢活潑好動，完全唔似懶洋洋嘅樹熊，但其實睇返佢個鼻就會發現真係有樹熊嘅特徵！

Photo from Disney

10. 滑嘟嘟：人體器官？！

麥當勞「吉祥物」除咗有麥當勞叔叔、漢堡神偷之外，仲有滑嘟嘟，滑嘟嘟唔似小飛飛咁一睇就知係雀，全身紫色嘅滑嘟嘟真身十分神秘。麥當勞2012年喺Twitter發文指「滑嘟嘟」其實係奶昔化身，所以佢最愛係飲奶昔。但近日加拿大一間麥當勞嘅分店經理Brian Bates就表示滑嘟嘟係「一個巨型味蕾」（an enormous tastebud），代表咗食物味道嘅抽象概念」。