蔡嘉欣不滿短髮被批似阿嬸連串反擊：「咁憎我又睇？」被網民批EQ低

娛樂新聞

By Cheryl on 07 Oct 2021

Digital Editor

蔡嘉欣2019年參加《香港小姐競選》落選後加入無綫。由於佢不時喺IG曬名牌手袋，仲試過拍片大曬40萬現金，故被網民指佢「拜金」、「愛炫富」。一向多是非嘅佢，日前喺IG玩你問我答時竟因髮型問題與網民掀罵戰！

Photo from 蔡嘉欣 IG

蔡嘉欣短髮造型遭網民批老氣

參選港姐前為KOL嘅蔡嘉欣經常在社交平台上載生活照，及與粉絲互動。日前佢邀請網民透過IG限時動態中嘅問答功能向佢發出提問，一名網民便留言指最近剪了短髮嘅嘉欣：「短髮勁似阿嬸」。

Photo from 蔡嘉欣 IG

蔡嘉欣反擊

蔡嘉欣見到該則留言，即嬲爆將嗰位網民嘅comment連帳戶名一拼repost，反駁：「其實你咁憎我點解又要睇我啲嘢呢？有得揀唔睇，點解都要睇呢？我啲嘢好好睇咩？」

Photo from 蔡嘉欣 IG

之後，有網民留言問蔡嘉欣：「人哋覺得似阿嬸都唔得？一定要讚你短髮好靚先得呀？」蔡嘉欣隨即回應：「梗係得啦」，然後佢作詳細解釋：「重點係真係唔明點解嗰個人要多次特登用假AC嚟我同我家姐個IG罵吓我哋。特登login番自己個假AC，再特登search kayan.c（蔡嘉欣IG帳戶名），再特登開我啲post同story睇。睇完再留言或者DM，步驟繁複都要繼續睇，好有恆心，畀個叻你。」

Photo from 蔡嘉欣 IG

蔡嘉欣被一網民「不停追擊」

蔡嘉欣「意猶未盡」，繼續分享批佢短髮老氣嘅網民留言出嚟，圖中可見，該網民對嘉欣怨氣甚重，不停攻擊：「EQ勁低，唔怪得之落選港姐」、「唔鍾意你就梗㗎啦，成日扮晒正面喺度教人做生意，眼中剩係得錢好嘔心」、「話你短頭髮唔好睇，又會即刻有人讚你個頭靚，假到呢，自尊心強唔接受負評」、「兩姊妹淨係識show名牌，一啲內涵都無」。