【賭命夫妻】Teris被網民稱為「最強人妻」！內外兼備係活髮公司創辦人！

By Stephanie on 19 Oct 2021

Digital Content Writer

ViuTV真人騷《賭命夫妻》最近成為城中熱話，邀請咗5對夫婦接受唔同嘅挑戰，並且贏取獎金。其中人夫Dennis喺節目中踩界嘅行為，仲一度令老婆Teris憤怒離場！事件引起網民嘅熱議，唔少網民都紛紛去Teris嘅IG留言表示支持佢，而事實上Teris係一位條件超好嘅人妻！

Photo from Teris IG

# 5對夫婦需面臨重重考驗！

由火火同陳嘉倩所主持嘅《賭命夫妻》邀請咗5對夫婦參加節目，佢哋必須接受唔同嘅挑戰先可以獲得獎金。其中最引人入勝嘅一定係「PTBF/PTGF誘惑」環節，而節目嘅大尺度隨即引起網民們嘅熱烈討論！

Photo from 《賭命夫妻》

# 人妻們代替PTGF誘惑丈夫？！

最近一集，節目組就安排5位人夫去遊艇同PTGF們矇眼玩遊戲，而事實上人妻們亦將會喺佢哋唔知情嘅情況下登場，並取代PTGF位置誘惑對方！輪到人妻Teris登場嘅時候，佢先係從後擁抱丈夫，並大跳熱舞，後來佢哋仲開始玩「軟糖遊戲」，即使兩人越貼越近，但Dennis都並冇叫停，兩人其後親吻數秒！

Photo from 《賭命夫妻》

# Teris因老公行為感到憤怒！

Teris隨即情緒激動怒摑Dennis，並憤而離場！其後Teris接受節目訪問嘅時候就講述對丈夫失望嘅心情，「嗰一刻我身份係PTGF，但佢都唔識Say No！嗰一巴係失望，破壞咗我咁多年對佢嘅信任。」；而Dennis亦有立刻解釋係因為事出突然：「嗰刻係食緊糖，但我都需要時間反應，例如：撞車都需要1秒時間反應啦。」

Photo from 《賭命夫妻》

# Teris公開為老公解圍！

不過網民們似乎就對於Dennis嘅解釋感到十分不滿，認為佢嘅理由好牽強！不過事後Teris就有喺IG上載同老公嘅黑白合照，「暫時宣布RIP！好多網民都叫我哋「離婚」，離婚我咪好傷心囉！大家都知道我係喊包，離婚咁大件事，應該哭到1公升眼淚，但我真係傻傻地愛著呢個男人！」，替丈夫解圍。

Photo from ViuTV FB

Photo from Teris IG

# Teris係事業女強人！

事實上，Teris除咗疼愛丈夫之外，仲係一位女強人嚟㗎～現年33歲嘅Teris係一間活髮公司嘅創辦人，仲係一間室內工程公司嘅Director，過去仲曾經喺ViuTV節目上分享創業嘅經驗，絕對係一位事業型女士！而佢嘅人脈亦十分廣，同楊思琦係好姐妹，仲同楊卓娜合作拍攝過影片。

Photo from Teris IG

# 被網民大讚身材好！

早前人妻們拍攝寫真嘅時候，就有唔少網民表示大讚Teris樣靚身材好，並大讚佢保養得好，可以話係內外兼備！

Photo from Teris IG

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

《賭命夫妻》人夫大解放與PTGF約會！驚喜送花/坐大髀貼頭影合照！Benson自爆仍掛念前女友

15 Oct , 2021

ViuTV真人騷《賭命夫妻》搵咗五對真實夫妻參加挑戰，要面對節目組安排嘅一連串考驗，爭奪獎金。節目涉及唔少夫妻間嘅大膽話題，喺網上亦掀起關注。最近人妻、人夫要面對PTBF、PTGF嘅誘惑，當中反映出人性，成為網民熱話！

Photo from ViuTV

ViuTV真人騷《賭命夫妻》尺度大掀熱話

《賭命夫妻》由火火、陳嘉倩擔任主持人，第一集要求5對夫妻寫上對方缺點、對伴侶講過最難聽嘅說話、甚至係床事最合拍嘅姿勢等，尺度大得嚟又引人入勝，隨即掀起網民熱話。最近節目組安排咗193（郭嘉駿）、肥仔（梁業）、Brian（陳安立）、Jeffery（黎學勤）以及 Dixon（黃奕晨）擔任PTBF（兼職男友）誘惑5位人妻。

Photo from ViuTV

PTBF（兼職男友）誘惑5位人妻，人妻Luna為Brian塗太陽油

其中Brian同人妻Luna為對方塗太陽油，Brian大晒健美身型，而Luna更親手接觸到Brian嘅背部、大腿等部位，令觀眾大呼場景相當誘人！唔少網友都表示同PTBF約會完之後，老公應該真係變咗做「前夫」。

Photo from ViuTV

人夫大反擊！與PTGF（兼職女友）約會

新一集到人夫大反擊！Liz（李文潔）、Ollie（溫穎琦）、孖四（張凱莎）、Angus（張若錡）、Mangie（羅曼菲）獲安排擔任PTGF（兼職女友），與5位人夫喺西貢共度三日兩夜！今次到人夫「拋底」老婆，一開始人夫同PTGF配對嘅環節已十分Juicy！

Photo from Ollie IG

Photo from ViuTV

首先5位PTGF戴住面具、著上泳衣跳入泳池，等5位人夫救佢哋，最後Sam同Angus、Benson同Mangie、阿匡同Ollie、Dennis同Liz、浩然同孖四「成功配對」，Benson表示對PTGF拍檔非常滿意，又話對方無論係樣定身材都無得輸，相反Dennis就拍自己中意孖四多啲，最終同浩然交換拍檔。

Photo from ViuTV

Luna老公阿匡同Ollie約會狂送驚喜！

上集Luna同Brain塗太陽油一幕令人印象深刻，Luna老公阿匡同Ollie約會亦十分開心，頭貼頭影相、拗手行街係基本，阿匡更貼心為Ollie安排約會行程去按摩，又趁Ollie去廁所偷偷哋出去買花送驚喜，約會氣氛超好～相反其他4位人夫就被指「唔識追女仔」！

Photo from ViuTV

Sam約會帶Angus拜神、「愛妻」浩然被Liz嫌棄唔識影相、追女仔無天份

首先Sam同Angus約會竟然去拜神，又喺大熱天時同佢行公路、沙灘，令Angus最後都忍唔住抱怨如果佢男朋友夠膽咁帶佢拍拖，佢會當日「飛咗佢」！

Photo from ViuTV

浩然雖然帶Liz去貓Cafe同出海，可惜Liz完全唔中意食甜品同漢堡包，加上浩然嘅攝影技術有限，Liz係咁叫佢再影過，連ViuTV攝影師姐姐都忍唔住出身親自教佢，Liz就直言浩然無咩追女仔天份。

Photo from ViuTV

Dennis堅持行郊野公園，被指唔理孖四感受

Dennis原本安排同孖四去行郊野公園，不過女方就指想去行街，最後孖四妥協陪Dennis去郊野公園，但要求Dennis之後陪返佢去西貢市中心。點知行郊野公園行到無時間，出去嘅公路又塞車，令孖四未能如願Shopping，但Dennis堅決唔認錯，又指要去行街要一早講定，稱市中心無咩行，搞到孖四發嬲，氣氛勁僵！雖然孖四嬲只係做戲，但Dennis亦被指太固執、唔理人感受。

Photo from ViuTV

Benson與Mangie約會，爆對方樣同身材都似前女友

Benson由揀PTGF開始已表現到「沉晒船」咁，又係咁讚拍檔Mangie樣靚身材好，約會時餵晒嘢食、又叫Mangie做「BB」。

Photo from ViuTV

之後佢更自爆佢咁中意Mangie係因為對方外型同佢前女友好似！Benson表示佢前女友係名流獨生女，同佢會去啲好靚嘅地方、好貴嘅餐廳約會，令自稱係「公屋仔」嘅佢知道原來喺香港有另一種生活方式，但兩人最終分手收場。

Photo from ViuTV

Benson對前女友仍未忘情？因自卑而分手

雖然Benson話前女友從未嫌棄或睇低佢，但佢十分自卑，，認為對方一直遷就佢，一齊耐咗就會頂唔順，但坦承如果唔係遇到依家嘅另一半（Ruby），佢會繼續同前女友拍拖，因為對方好有魅力，可惜自己怕無法令對方一直開心落去。

Photo from ViuTV

Mangie一路開解Benson，令佢釋懷咗啲。Benson都大讚佢係好女仔，到分開時亦表現得依依不舍，連火火都話佢約會完仲講咁多嘢，一定有真感情！

Photo from ViuTV

網民指Benson同Ruby呢pair夫婦感情最脆弱

網民睇完呢集後指浩然雖然同PTGF約會，但係咁提起老婆：「咁愛妻，嚟錯節目啦」。又指Benson同Ruby呢pair夫婦感情最脆弱，一嚟兩人結婚時間短，只有兩個月，而且Benson表現到仍然好掛住前女友，又喺節目中不停講婚姻係責任：「成日強調鐘意或『唔鐘意』都要負責任」、「係男人都覺Benson 老婆有啲慘」