Coffee林芊妤自爆懷孕3月才被求婚過程Hea爆大呻：未試過有男人咁對佢

娛樂新聞

By Cheryl on 10 Nov 2021

Digital Editor

Coffee林芊妤離巢TVB後成功轉型做瑜伽教練及KOL。近日，佢更在自家YouTube頻道上載了同老公翟志榮嘅首條訪問片，大玩「快問快答」，當中Coffee爆出老公當年向佢求婚嘅過程Hea到爆！更話未試過有男人咁對佢！

Photo from Coffee林芊妤 IG

林芊妤首次同老公一起拍訪問片

Coffee於2018年宣佈懷孕4個月，並與交往3年、任職銀行嘅澳洲籍馬來西亞華人翟志榮入紙申請結婚。Coffee誕下兒子翟德彥（伯伯）後經常在社交網分享幸福家庭照及生活點滴，不時引起熱話。

Photo from Coffee林芊妤 IG

Coffee由藝人轉做瑜珈教練兼KOL後獲不少支持，其YouTube頻道擁有155萬粉絲，佢上載嘅瑜伽教學片深受女士歡迎。最近，佢拍了首條與老公一起拍攝嘅「快問快答」訪問片，雙方都會被問對對方嘅不同睇法。

Photo from Coffee林芊妤 YouTube

林芊妤大爆老公Hea爆求婚過程

其中一條最有趣嘅問題就係，翟志榮被問覺得Coffee認為佢做過最感動嘅事係咩，佢回答係求婚。Coffee聽到便立即否認：「求婚？大家想唔想知道佢點樣求婚啊？」

Photo from Coffee林芊妤 YouTube

然後佢表示當自己懷孕5個月時（後來更正為3個月），Coffee正在家房間，燈光突然被關，然後有東西眨吓眨吓，「原來係戒指，仲要跌咗落地下，佢（老公）執返起身，仲要跪都唔跪，話『嫁畀我啊』，咁樣係最感動？」

Photo from Coffee林芊妤 YouTube

翟志榮聽罷則說：「個point係佢記得啊。」Coffee再反駁：「我記得係因為最差啊嘛！我個人生未試過有男人咁對我！一定唔係呢樣囉！錯！」

Photo from Coffee林芊妤 YouTube

林芊妤認為感動時刻都在小細節上

Coffee表示最感動嘅事應該係一啲細節位，例如兩人睇戲時，老公借外套畀佢，即使佢凍都唔會問Coffee取回；Coffee又指，佢懷孕7、8個月時，老公會幫佢抬行李箱。翟志榮聽了都說：「呢啲都係好基本嘅嘢~」而Coffee自己都話：「你知就好啦！」、「我係咪要求太低？」

Photo from Coffee林芊妤 YouTube

林芊妤與老公大談對方奇怪習慣

另一有趣問題就係，被問到婚後發現對方最奇怪嘅習慣係咩，翟志榮表示，Coffee竟然有如廁後不沖廁習慣，令佢好奇老婆是否想讓別人知道自己有多健康而留低「便便」給人觀看。Coffee聽到都尷尬得哭笑不得，又堅稱自己只係忙著思考其他事情而忘記沖廁而已。到Coffee回答問題時，就表示老公嘅怪習慣係周圍放屁，原來兩公婆嘅怪習都係排洩相關，相當搞笑。