保錡@ERROR翻唱陶大宇版《倒轉地球》網民大讚眼神到位但太啱Beat！

娛樂新聞

By Cheryl on 30 Nov 2021

Digital Editor

「師奶殺手」陶大宇近年轉到內地發展演藝事業，同時參與不少商演獻唱掘金，佢翻唱劉德華嘅《倒轉地球》更成為了網絡熱話，連ERROR成員保錡都忍唔住扮佢，被唔少網民讚佢誠意十足，眼神到位！

Photo from 保錡 IG、陶大宇微博

陶大宇內地唱《倒轉地球》成熱話

58歲陶大宇同唔少香港藝人一樣，近年北上掘金，佢登台商演時常唱劉德華嘅《倒轉地球》及《愛我一萬年》。雖然佢不時走音及甩beat，但演唱過程成功保持堅定眼神，好多網民被佢嘅「魔音」與台風迷倒，成為了內地網絡熱話，其演唱片段更達數以億計。

Photo from YouTube截圖

Photo from 微博

網民想推陶大宇上春晚

有不少內地網民更集氣希望陶大宇可以上春晚表演，更封佢做「2021年度廣東省最受歡迎男歌手」，並希望佢參加《披荊斬棘的哥哥》第二季。

Photo from 微博

除咗內地節目，仲有網民惡搞陶大宇成2021年度叱吒樂壇流行榜頒獎典禮中嘅「我最喜愛男歌手」之一，以惡搞圖表示自己已投陶大宇一票。

Photo from 微博

連杜汶澤都頂唔順！

現時在YouTube搜尋《倒轉地球》，陶大宇嘅翻唱版排名比原版劉德華更高，成為第一個搜尋結果，傳播度認真高。杜汶澤因此更在FB出post，跪求大家唔好再轉發陶嘅《倒轉地球》，「再咁搞法，下一代會以為佢至係原唱者！」

Photo from 杜汶澤 FB

保錡@ERROR翻唱陶大宇版《倒轉地球》

ERROR成員之一保錡同樣被陶大宇嘅表演感染到，日前於IG上載了自己演繹陶大宇版《倒轉地球》影片，並表示自己最近大愛此歌，所以不得不重唱一次，佢為咗將表情同語氣表現得最好，更將陶大宇嘅演唱片段重複睇咗100次！片中，可見佢將燈光set好，眼神跟原版一樣帶點空洞，帖文同時設有保錡獨唱版及佢同陶大宇嘅編輯「合唱版」。