港女無辜被指有外遇！遭男友媽媽怒打！得知認錯人後厚面皮回應
男友媽媽態度突變
情侶之間互相上對方屋企食飯其實都好平常，喺香港討論區有網民開post，佢稱最近上男朋友屋企食飯，對方媽媽一改平日有講有笑嘅態度：「唔理我又黑口黑面」
雖然男朋友安慰佢應該係媽咪心情唔係咁好，但事主都心驚膽跳，食飯都唔敢出聲，驚講錯野激親伯母。
質問事主做咩偷食！唔聽解釋更怒打佢一巴
但食完飯後佢被男友媽媽叫入廚房洗碗，一入到去對方即閂門質問佢：「點解晏晝係街到拖住第二個男仔，夜晚仲要咁厚面皮上我屋企食飯？」
事主解釋佢喺沙田返緊工，佢問伯母喺邊到見到佢拖第二個男仔，男友媽媽稱喺金鐘遇到事主，又指：「你點解釋都無用，唔好以為換咗套衫上嚟食飯就可以瞞得到我！」
事主情急之下捉住咗男友媽媽隻手，堅稱自己無做過，但對方竟一嘢fing開佢仲打咗佢一巴！男友母親指事拖完第二個男仔唔好掂佢，事主委屈之下忍唔住喊咗出嚟。
得知認錯人後，男友母親輕描淡寫引事主不滿
男友聽到聲就入廚房睇下發生咩事，得知事件後佢向媽媽證實女友真係一收工就上佢哋屋企食飯，根本無時間去金鐘拖第二個男仔。
男友母親知道自己認錯人後都十分尷尬，佢乾笑兩聲表示：「又會咁似都有架咩」，仲叫男友同事主出返去唔好阻住佢洗碗。事主見狀大感不忿：「屈完人之後一句唔好意思都無，唔通長輩真係大晒？」
網友勸事主考慮分手，以免日後婆媳相處出問題
唔少網友都十分同情事主，稱就算佢真係有外遇都唔應該出手打佢，更何況係認錯人，事後應該要向事主道歉。事主指男友叫佢唔好同佢媽媽計較，但佢都係好唔開心。
Photo from 香港討論區
Photo from 香港討論區
有網民就勸佢諗清楚日後結婚點同呢個奶奶相處：「未過門就郁手，過咗門仲得了？！」，不過事主稱佢同男友拍拖約9個月，暫未有結婚計劃。亦有人認為男友媽媽可能睇佢唔順眼好耐，今次只係借題發揮。
Photo from 香港討論區
Photo from 香港討論區
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
更多相關文章
男友一日僅回2、3個訊息！港女唔懷疑有第三者：全日唔覆都無問題
2 Dec 2021
男友一日僅覆2至3個訊息
有女生喺Dcard以「覺得自己好痴線」為題開post，佢表示就算男友成日都唔搵佢，佢都唔會唔開心，反而好期待。
樓主指男友平日其實都好少覆佢：「一日最多2～3個msg」，又話好期待男友會全日都唔覆佢，但佢亦稱對方唔搵自己亦唔需要咁煩惱，輕鬆面對即可。
網友質疑咁都叫拍拖？！港女解釋男友工作忙
不過有網友就質疑：「一日最多兩三個message？？樓主你真係拍緊拖？忙我都理解，但真係忙到咁咩」
Photo from Dcard
樓主解釋男友工作極忙，經常要ot到11、12點，有時放假都仲要返工做嘢，所以佢認為男友唔應機都正常：「體諒下佢，返工都好辛苦啦，唔通仲投訴佢唔覆msg咩」
樓主籲不必懷疑有第三者，最緊要對自己有自信
樓主指佢唔會第一時間懷疑男友有外遇：「如果真係去到懷疑個一步，我相信感情一早出現問題」，佢教路最好喺平時面對面溝通嘅時間內雙方好好溝通。
佢呼籲女生要對自己有自信：「無咩事做咩要懷疑對方」，佢指要自信自己條件咁好，男友唔會無啦啦瞞住佢偷食。
樓主表示好多情侶遇到另一半唔覆嘅時候，會好不安、無晒自信，佢指要相信自己：「好多時候學下幽默，放鬆下心情，可能對方真係忙緊呢」
網友笑言：自我安慰？
不過網友就唔係好buy佢嘅睇法：「其實原po係咪自我安慰緊自己」、「一日2-3個msg..係咪真係拍緊拖，不過樓主開心就好啦」、「單身開心啲喎」，有網民就指即使係一個忙人，點都會去廁所：「我好多時去廁所就會帶埋電話覆」
Photo from Dcard
Photo from Dcard
Photo from Dcard
Photo from Dcard
但亦有人認同樓主：「呢樣嘢都真係講個信字」、「有時返工忙起上嚟，真係未必有時間睇電話覆message，最緊要自己feel good。」
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
