「最霸氣辭職方法」掀網民熱議！打工仔向老闆直言：見緊工，轉頭打比你
如何辭職仍不失霸氣？！
辭職有好多種原因，最近連登討論區就有網民開post指「唔想撈，想諗定一個最霸氣嘅辭職方法」，更向網友「取經」，睇下有無人可以分享啲「霸氣辭職」例子參考下。
賠一個月糧即走
有網友就提議「賠一個月糧即走」，雖然有超過1,900個正評，但有唔少人都認為如果唔係下份工要即刻返，補錢畀舊公司好唔著數，亦有人分享曾有同事賠3個月糧即走：「新公司係同行大競爭對手，走果時feel到佢行路有風」，非常灑脫！
直接回老闆見緊工唔得閒覆
有超過3,000個正評嘅回覆表示佢遞信辭職之後每日返工都會行開幾個鐘做自己嘢，有次更試過成6個鐘都無返公司，最返老細打電話問佢去咗邊，佢霸氣回應：「見緊工，轉頭打比你」
呢個留言咁多正評，有網友封佢為「辭職師」，不過亦有網民表示：「使唔使咁串」，又指佢新工如果要做Ref Check可能會出事，因為佢見過同事激到老細太嬲send咗封email畀同事新公司老闆同HR，結果新公司好快就搵咗個籍口炒咗佢！
求其買散水餅
有網民就指可以買啲雜錦餅當散水餅派，不過被反駁稱根本唔使買散水餅：「仲買散水餅？！可以有幾霸氣」
全team人集體遞信
其實辭職最威嘅應該係被公司挽留，有網民分享佢公司有一team人都對某啲事情感到不滿，曾集體向公司反映意見，但都無改善到，最後成team人一齊走，最後公司要出高薪請返一批人去填補返啲空缺，唔少網友都感羨慕：「全team一齊走真心型！」，亦有網友建議係咁OT令老闆想你留底，但就被嘲：「老闆只會覺得你天真！」
如常返工，放工後直接消失
有留言稱：「收工時正常bye bye, 第二日人間蒸發，私人嘢都無拎走」，仲以為佢已不在人世，但原來「過一排先知中左過千萬六合彩」，呢個夠晒威！
各種霸氣辭職信
另外有唔少網友分享一啲「霸氣」辭職信，例如成張A4紙都寫滿「我唔做喇！」；用毛筆字手寫辭職信；寫個公仔喺廁紙到當辭職信等。又有人指曾見過新同事第2日返工打開Word，以最大字體打「我辭職」，之後就無再見過佢！
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
更多相關文章
55歲新同事返工5分鐘就辭職：份工唔啱我！公司請人求其vs份工太辛苦
13 Dec 2021
公司聘請新同事
同事離職喺職場上十分普遍，有時會慶幸一啲合作唔愉快嘅同事離開，令工作更順利；亦有時會擔心新同事無舊同事咁好相處，而新入職嘅員工亦可能會因為去到一個新環境而感到緊張。
最近喺香港討論區就有網友發文指公司一位同事即將離任，為填補返個空缺，公司聘請咗一位新員工，並希望即將離任嘅同事可以教返新同事日常工作。
55歲新同事返工學習5分鐘決定離開公司
新同事入職當日樓主嘅上司就為部門各位同事作介紹，樓主指新同事年齡約為55歲以上，應該擁有豐富嘅工作經驗，並非職場新人。
之後將離職嘅同事就與新同事作工作交接，等佢了解實際工作嘅流程，點知令人意外嘅事發生，新同事聽咗大約5分鐘，就表示份工唔太適合佢，之後離開公司。
返工僅20分鐘就辭職
一班同事都十分錯愕，樓主指新同事由踏入公司門口計起、到上司介紹新同事、之後舊同事教新人工作，全程只係20分鐘左右，返工短短時間就辭職，樓主表示：「認真經典」
樓主又稱呢位新同事打破佢喺舊公司時請完新人，唔夠一個鐘（約40分鐘）就唔做嘅記錄，真係一山還有一山高！
網民有唔同意見：份工好辛苦/公司請人太隨便
由於樓主未有透露有關職位，有網友就估計嗰位新同事年屆55歲，唔做得啲太辛苦嘅工作於是先辭職。有網友就指佢都見過有人返一個鐘就走咗，認為都係好事因為唔使浪費時間教佢，對方亦唔使花時間學佢唔想做嘅嘢。
更有網民表示樓主嘅經歷只係小事，佢公司曾經有人返咗3日工，個個都以為係新同事，點知後來先知公司無請過人，「新同事」只係「白撞」。
亦有網友指出樓主公司請人好有問題：「你地公司請人都好求其喎」，不過可能面試嗰陣無咁多時間全面了解求職者嘅為人先會發生呢件事。
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
