望月樓空少確診，22名員工入隔離營大嘆無辜！怒斥國泰放任機組人員累街坊

又一城望月樓爆發Omicron感染群組，超過300人被送到竹篙灣隔離營。而望月樓22名員工及其家人都喺隔離營中跨年，日前望月樓Facebook則發文怒轟政府防控不力、國泰管理消極：「點解要我哋埋單？」

望月樓Omicron群組增至6人，22名員工需入竹篙灣隔離營

「望月樓Omicron群組」現時已增至6人，多幢大廈需要強制檢疫。超過300人被送入竹篙灣隔離營，當中包括望月樓22名員工及佢哋嘅家人。

近日望月樓Facebook專頁發文，更以「竹篙灣隔離營被選中的22人」為署名，佢哋指已喺隔離營渡過4日，但仲有遙遙嘅17日未能與外界接觸。

望月樓「被選中的22人」發文轟斥政府及國泰

望月樓22名員工稱：「所有人狂歡歡渡新年嘅呢4日，變成我地有生以來最難捱嘅4日。」，又指每晚輾轉反側喺度諗佢哋究竟做錯啲咩搞到家人、小朋友都要入竹篙灣。

22位員工表示所有同事打哂針、用哂安心出行、公司跟足防疫指引、跟足法規但都要面對咁嘅難關，佢哋又怒轟政府關口防控不力，採取過於寛鬆嘅免檢疫安排。

另外又指國泰消極嘅管理態度，放任機組人員違規，有人漠視自己高危身份，令病毒喺市區傳播開：「點解反而最後變成我地公司以及"被選中的22人"無辜地幫手埋單？！」，又表示唔明點解連屋企人都要去竹篙灣隔離。

中菜餐廳飽受疫情打擊

望月樓員工表示疫情爆發至今，中菜從業員首當其衝：「呢3年間，我地每一個同事都係抱住 "今朝有工今朝返" 嘅心態。」，佢哋稱啱啱呢幾個月中菜餐廳先慢慢回復「正常過咗一個小陽春」，但呢次無辜嘅不幸事件又令佢哋跌入萬丈深淵。

佢哋指依家「極度無助」，今年嘅新年願望希望可以盡快過完呢21日同屋企人團聚：「之後就希望政府加快檢測俾望月樓開返做正常生意。」

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）