43歲「小飛俠」林燕玲重返主播枱！超強凍齡網民大讚依然咁靚

By Cheryl on 09 Feb 2022

Digital Editor

前TVB及NOW新聞主播「小飛俠」林燕玲退出主播界多年，於2017年宣佈與金融才俊葉浩文結婚，二人育有一子。佢曾於2020年為ViuTV主持財經節目，到咗近日佢更正式加入鳳凰衛視香港台，重返新聞主播崗位，唔少網民都大讚佢到呢家都仲係咁靚！

Photo from 林燕玲 FB

林燕玲相隔10年重回主播枱

43歲林燕玲於2003年加入TVB擔任新聞主播，因一頭清爽短髮造型似小飛俠阿童木，所以有「小飛俠」之稱。到2006年，佢轉投NOW TV，其後晉升為首席主播；到2011年，由於NOW TV發生內部調整，林燕玲於同年辭職，轉行到渣打銀行出任「認股證銷售副董事」。

Photo from TVB

離開電視螢幕多年，林燕玲於2020年亮相ViuTV主持財經節目，展開重返幕前第一步。到今年，佢正式重返主播枱，加入鳳凰衛視香港台主持《全球新聞報道》，對此感到高興嘅林燕玲近日都在IG上載不少主播照，其支持者都紛紛留言大讚佢依然咁靚，亦非常期待再次睇佢報新聞。

Photo from 林燕玲 FB

同金融才俊老公育有一子

林燕玲自入行以嚟有過不少感情傳聞，佢曾在2009年被傳與有婦之夫龔耀輝偷情，引起爭議後佢被暫調外電組擔任編輯。到2017年，林燕玲同拍拖一年嘅金融才俊葉浩文拉埋天窗。據聞葉浩文27歲時已在澳洲修畢生物化學博士學位，並於基金公司任職高級副總裁。林燕玲在2020年誕下一子，一家三口幸福非常。

Photo from 林燕玲 FB

老公曾有外遇傳聞，林燕玲樂觀面對

不過，葉浩文在2020年被傳暗撻2013年落選港姐周依婷（Phoebe），而周依婷比林燕玲細16年。據悉，葉浩文與周依婷同在一間資產管理公司工作。當時有爆料人稱，葉浩文在太太林燕玲懷孕7個多月時，在公司與不同部門同事搞唱K活動，期間同周依婷發生婚外情，有指戀情傳遍公司，二人又會一起搭車上下班。有傳媒曾拍到二人經常單獨食飯，周依婷更在街上擁抱葉浩文。