何家勁投資千萬在內地開58萬呎食品廠派開工利是無架子網民：仲請唔請人？

娛樂新聞

By Cheryl on 10 Feb 2022

Digital Editor

何家勁早年靠演《包青天》中展昭一角紅遍亞洲，佢近年已退出幕前，轉到內地打理健康食品生意，仲有傳身家早已過億。佢在內地嘅食品生產廠房日前復工，「何老闆」就舉行了隆重嘅開工儀式，仲向員工大派利是！

Photo from 何家勁微博

何家勁退出幕前到內地開食品工廠

62歲何家勁當年在劇集《包青天》中飾演展昭一角收穫超高人氣，更被稱為歷代最靚仔嘅展昭。但佢近年已淡出演藝圈，到內地開設自家品牌「勁家莊」，設有工廠專門製作及售賣健康食品。何老闆生意搞得有聲有色，外界估佢身家已經過億！

Photo from 微博

Photo from 何家勁微博

農曆新年剛過，何家勁嘅廠房於昨日（9日）正式開工，作為老闆嘅佢舉辦了開工拜神儀式，並將照片上載微博，寫道：「祝願各位同事們身體健康！萬事如意！開心工作！」

Photo from 何家勁微博

過年開工向員工大派利是

何家勁亦於抖音上載影片，分享自己在儀式上向員工大派利是情況。片中可見，何家勁站在公司門口，手中拿着一疊利是，逐一派發畀排隊嘅員工。期間佢會向員工點頭問好，毫無架子，而有利是收嘅員工睇落都非常開心，現場氣氛好熱鬧。不少粉絲見到有利是收，又可以見兒時偶像，都紛紛留言表示好想到勁哥嘅工廠上班。

Photo from 何家勁抖音

工廠同時係旅遊景點

何家勁2011年投資3000萬港元，同好友一齊創立「勁家莊」，為專心打理生意，佢已定居內地。「勁家莊」佔地5.4萬平方米（約58.1萬平方呎），除咗有廠房生產和處理食品，佢更將工廠發展成旅遊景點，工廠周圍有綠色園林區，風景唔錯。工廠不但榮獲「廣東省工業旅遊示範基地」、「惠州人最喜愛的工業旅遊景區」稱號，更被評為「國家AAA級旅遊景區」。

Photo from 勁家莊

Photo from 勁家莊官網

何家勁曾自爆有女兒？！

何家勁生意發展蓬勃，但近年感情生活成謎。佢1989年拍電視劇《不了情》對金素梅一見鍾情，其後雖然分手，但何家勁曾表示仍深愛對方，仲話過假如大家到60歲都仲未結婚，就再續前緣共度餘生。到1998年至2001年，佢曾同女星李婉華相戀。雖然何家勁未有透露過現時嘅感情狀況，但佢在去年曾於留言疑似自爆有女兒！