「NFT有咩用？」掀網民熱議同奢侈品差唔多？網民：有人炒就得！

By Cheryl on 17 Feb 2022

Digital Editor

近年，娛樂及潮流界都掀起一股NFT熱潮，唔少明星都透過NFT勁賺數百萬港元不等，就連部分素人及KOL都相繼加入NFT大軍，當中有賺有蝕。有網民就開始熱議究竟NFT價值何在，以下就帶大家睇下佢哋嘅不同意見！

Photo from Bored Ape Yacht Club Opensea

大量明星、素人湧入NFT市場

NFT（Non-fungible tokens 非同質化代幣）起初主要受藝術界追棒，但近期有越來越多明星都玩埋一份，例如周杰倫旗下潮牌推出嘅NFT，發行10多日嘅交易總額已超過$4.7億、而TVB花旦戴祖儀就靠NFT勁賺500萬！素人方面，亦有一名印尼男子透過上載近千張自拍照NFT，狂賺超過7百萬港元！

Photo from 周杰倫 IG

陳冠希NFT現技術事故，跌穿發行價

雖然唔少藝人都因為NFT獲取龐大利潤，但唔係個個都穩賺。近日，陳冠希推出嘅NFT系列「RED NVLPE」卻出現重大技術事故，不少粉絲大呻，鑄造完佢嘅NFT後遲遲未收到圖片，或鑄造一個後，竟無故收到多個NFT。雖然官方已作出補救，表示已修復問題，又保證所有白名單內嘅持有者都將在鑄造後獲得1個NFT，但事故已令當中大部分系列都跌破發行價。

Photo from CLOT YouTube

Photo from Clot IG

網民質疑NFT價值

NFT熱潮下，唔少網民開始質疑其價值與意義。有網民在連登討論區以「啲NFT其實有咩用」為題發文，表示：「一個NFT就可以賣成幾千港紙，想問NFT有咩嘢令佢咁值錢？」又問：「飾金幾萬蚊買嚟都真係可以戴上身，請問NFT有咩價值喺到？」

Photo from 《愛回家之開心速遞》TVB

與元宇宙發展息息相關

有網民認為NFT值錢位於佢運用了區塊鏈技術（Blockchain），並不能將之複製，而近期興起嘅元宇宙在原則上都將採用同樣嘅技術架構，買家可在元宇宙獲得獨一無二嘅物件。不過，該網民亦補充：「點解會炒到咁貴，就係有班XX同班有錢傻仔講咗以上嘅對白。」而另一網民則搞笑回應：「但係獨一無二嘅一舊屎又有咩價值？」

Photo from Meta

網民：有人炒就有價值！

另有人參考樓主所講嘅首飾比喻，反問：「倒返轉來講，幾萬蚊買返來戴喺身你又覺得值？好明顯呢個唔係重點。」至於重點在哪？有人認為在於「有人炒」，該網民認為佢同大多奢侈品相似，「你從實用價值去睇就一啲都唔值，但就係大把人會買。」講到呢度，有網民就諗起潮牌Supreme曾於2016年推出一塊刻有品牌名嘅磚頭，磚頭竟在數分鐘內被搶光，之後更被人炒到上1千美元！