全日本最恐怖鬼屋再升級！「絶凶・戦慄迷宮」嚇到你喊！背後仲有一段鬼故事…

如果你自認超大膽、天不怕地不怕，咁小編覺得你要去一去日本富士急高原樂園嘅鬼屋先再講～因為個鬼屋真係怖到不得了…

號稱全日本最恐怖嘅鬼屋「絶凶・戦慄迷宮」係7月15日竟然再升級成為「絶凶・戦慄迷宮～血塗られた人骨病棟～」，而內容嘅恐怖程度當然會提升好多好多倍！

Photo from マイナビニュース

普通嘅鬼屋都唔算最驚，依一個鬼屋最恐怖之處係將鬼屋同迷宮結合。就算你可以係迷宮入面順利逃出，都需要花上至少60分鐘！

Photo from 日本富士急高原樂園

鬼屋嘅設計就更加令人覺得心寒，因為佢係設定為一間破舊廢棄醫院！堆滿人骨嘅地下通道、處理病人屍體嘅房間等等等等，真係聽到都驚！

Photo from 日本富士急高原樂園

如果你有興趣去挑戰的話，可以聽埋醫院背後嘅鬼故同睇下官網簡介先去～如果唔係小編驚你會嚇到喊～

「位於富士山腳下嘅慈急總合病院本來係一間好大、質素好嘅醫院，但係後來院長同醫生隨便開藥比病人，甚至係開刀嘅時候攞走患者嘅器官去賣，並將犧牲嘅死者裝係大木桶入面…聽講夜晚依班枉死嘅孤魂會搵醫生索命…醫院最終被迫廢棄…」

好驚啊媽啊！！小編睇完都已經唔夠膽去，你哋呢？

Photo from PR Times

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）