外賣員第一城落車僅10秒即被鎖車！網友爆每鎖一部車都有獎金分
Photo from 東張西望
外賣員第一城落車僅10秒即被鎖車
香港好多私人屋苑面對私家路非法泊車嘅問題，大多會採取鎖車行動。Facebook群組「車cam L（香港群組）」有網民稱有外賣員揸電單車到沙田第一城送外賣，點知落車唔夠10秒，就被人極速鎖車，全程唔使半分鐘。
Photo from Facebook群組「車cam L（香港群組）」
該網民更分享影片，表示：「架外買電單車我睇住佢剛停架車，唔夠十秒，即鎖，連停車+鎖車，唔洗三十秒。送外賣啫，司機又唔洗一分鐘番嚟，今時今日環境，搵食啫，放人一碼都唔得」，佢更直言著黄色背心嘅人員「態度非常差」。
Photo from Facebook群組「車cam L（香港群組）」
網友抱不平，斥工作人員不近人情
片中可見鎖車行動迅速，黃背心工作人員影相作紀錄，後面外賣員雖然想同工作人員理論，但黃色背心人士直接行過，並未理會。
Photo from Facebook群組「車cam L（香港群組）」
Photo from Facebook群組「車cam L（香港群組）」
外賣員頂住凜冽寒風送外賣，又於一分鐘之內上返車，但第一城工作人員嘅鐵面無私，分分鐘令外賣員一日收入凍過水，網友紛紛為片中外賣員抱不平，認為「第一城鎖車隊」行事太過不近人情。
Photo from Facebook群組「車cam L（香港群組）」
網友指第一城出名鎖車快狠準，籲車手唔好接單
有網民就表示：「第一城出咗名鎖車快狠準！」指第一城出咗名鎖車好嚴格，仲無情講！唔少網友都表示第一城喺行內都出晒名，更呼籲車手齊齊拒接第一城嘅單。
Photo from Facebook群組「車cam L（香港群組）」
Photo from 愛回家之開心速遞
網民直言：「居民交管理費等同間接支持呢啲鎖車行為，咁唔該啲居民俾啲骨氣，唔好再叫外賣嘞！」、「以後第一城無得外賣無得送貨，唔好怪人」
Photo from Facebook群組「車cam L（香港群組）」
被鎖車即付$320
網友又大嘆外賣員可憐，只係落車送個外賣就無咗$320，有人「恨鐵不成鋼」唔明點解仲有人會接第一城外賣單，有網友為佢解釋：「有啲新人啱啱入行，唔知就瀨嘢」
Photo from 愛回家之開心速遞
Photo from Facebook群組「車cam L（香港群組）」
爆鎖車有獎金分
又有網民大爆鎖車隊每鎖一架車都有commission分，所以會毫不留情直接鎖車。呢個爆料得到唔少網民「確認」，認為唔係有獎金攞，點會落雨都衝出嚟鎖車咁積極。更有人直指管理公司內部有條文寫明每鎖一部車就有$100獎金。
Photo from 東張西望
Photo from Facebook群組「車cam L（香港群組）」
Photo from Facebook群組「車cam L（香港群組）」
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
更多相關文章
壽司郎食客籌號超過30分鐘，超惡要求店員補飛！店員高EQ處理獲網友激讚
10 Jan 2022
食肆好多時會列明籌號超過5個將不設「補飛」要重新輪候，但未必個個食客都會遵守。近日有網友影到黃埔壽司郎有食客疑逾時30分鐘先出現，竟要求店員安排佢補飛入座，掀網民熱議。店員超高EQ嘅回應亦獲一致大讚！
「香港突發事故報料區」網友公開食客大鬧黃埔壽司郎片段
香港好多食肆都大受歡迎，午餐、晚餐都會出現滿座情況，所以要先行攞飛輪候入座用餐。「過江龍」壽司郎登陸香港後開咗唔少分店，但間間都大排長龍，即使如此每日都仲有大量食客願意等候。
近日喺Facebook群組「香港突發事故報料區」有網友公開一段拍攝於壽司郎門口嘅影片，全片時長為7分45秒。網友稱片段係2022年1月9日下午4點半於黃埔壽司郎拍攝。
一男一女輪候籌號已逾時超過30分鐘，女子要求店員「補飛」安排入座
片中一男一女正喺壽司郎門口等候入座，女士表現十分不耐煩：「要等幾耐呀？快啲啦！」，終於有店員前來處理，女士指佢籌號已過，但要求店員為佢「補飛」安排入座。
店員則表示相關嘅籌號已經過咗超過30分鐘，按照公司規定將不獲「補飛」，建議佢哋重新攞飛輪候，女士聞言大為不滿，佢指自己係喺預約籌號：「咁樣係咪有啲唔公道？就算要候補係咪要先過walkin嗰啲呢？」佢又指壽司郎咁樣嘅處理方法並唔係第一次：「上次你哋荔枝角（分店）都試過係咁！」
店員建議畀卡片佢向客戶服務反映情況，女子大怒質疑未過30分鐘
店員一直禮貌回應：「明白明白！」，但重申呢度幫唔到佢入座，稱可以畀張卡片佢向客服方面求助。女士聲量越嚟越高：「你唔好話幫唔到！咁我唔舒服有咩辦法姐？！畀張卡片我無用㗎！依家你哋係要即刻解決問題！」
女士又指佢有用手機App睇叫號情況，質疑根本未過30分鐘：「你哋單方面話過咗30分鐘，我哋都可以話唔係㗎，唔係你哋講就係㗎嘛！」，又要求店員提供證據證明叫號過咗30分鐘。店員亦解釋電腦未能顯示叫號時間等資料，但仍帶女子睇電腦資料，由於候補籌號已叫到375號，推算女士所持嘅358號過時已逾30分鐘。
女士大聲指：「依家點先？快啲解決個問題佢！我哋係咪會快過walkin先，我哋一早攞咗飛！我哋只不過係過咗鐘咋嘛！」，店員亦再強調已過30分鐘，只可以提供卡片，女士大怒：「你咩數據都畀唔到我又叫我排walkin隊！」
女子暗示會投訴店員，網友指無理取鬧，反讚店員態度好
女士：「依家唔係食一餐飯嘅問題，呢個係唔公道嘅問題，呢個係原則問題呀嘛！」、「嘥時間啦！講埋啲廢話！你叫咩名！」之後女士就大聲讀出店員名字似暗示會投訴該名店員。
影片最後女士走出商場範圍並繼續大罵：「完全唔合理！唔係食唔食嘅問題，你數據又畀唔到我！」，片中更錄到疑似拍片人嘅聲音：「好嘢好嘢！走咗走咗！」
唔少網友直指女子無理取鬧，仲要出口傷人十分無品：「影衰晒香港人！」，而片中女店員面對咄咄逼人嘅顧客仍耐心點頭，又冷靜回應，獲讚好有禮貌：「EQ好勁！」
圖片來源：壽司郎、Facebook群組「香港突發事故報料區」、LIHKG
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
