東張西望｜港女哭訴殯儀館拒收新冠離世父親有遺體下落不明？醫院負荷過重系統崩潰

時事熱話生活熱話

By Cheryl on 10 Mar 2022

Digital Editor

第五波疫情持續，本港醫療系統及殯儀館都不勝負荷。TVB節目《東張西望》近日訪問了被殯儀館拒收確診父親遺體嘅家屬，以及質疑醫院延誤救治親人嘅家屬，可見各方因疫情下嘅安排感到相當無助。而近日更有伊院醫生壓力爆煲，在員工座談會上淚崩！

Photo from TVB

疫情下有家屬無法為離世親人舉辦喪禮

家屬黃小姐在《東張西望》上哭訴，其爸爸在2月確診新冠肺炎後，不幸在3月離世，但多間殯儀館都拒收遺體，令佢非常無助。由於佢爸爸生前曾確診，所以遺體相信係被劃分為以黃色標籤識別嘅「第二類遺體」，此類遺體帶有指定傳染病毒，當中就包括新冠肺炎。

Photo from TVB

《東張西望》致電多間殯儀館查詢，有指呢類遺體有特別處理方式，佢哋必須被裝入袋中，亦唔可以進行防腐處理、裝身和化妝。另有業界工作者因怕在處理遺體時被傳染，所以不便為黃小姐爸爸舉辦喪禮。在不同疫情準則下，黃小姐無法為離世父辦理身後事，傷心嘅佢不禁聲淚俱下。

Photo from TVB

其實黃小姐爸爸嘅病毒指數在離世前已很低，達CT值37，但因為肺功能太差才逝世。而政府規定CT值30已可回社區生活，更不用隔離。但黃小姐爸爸最後仍被歸入第二類遺體，導致有好多處理都不能進行。節目組亦有訪問專家梁子超，佢表示CT值只係其中一項衡量準則，而黃小姐爸爸係在確診短期內離世，所以難以排除遺體內仍有病毒嘅可能性。

Photo from TVB

而對於病情持續惡化嘅患者，CT值並不能代表患者傳染力低，因為無法在患者身體找到成功抵抗病毒嘅跡象，病毒亦有可能殘留在體內，所以黃小姐爸爸被歸類為第二類遺體。

Photo from TVB

有確診遺體下落不明

除了無法辦喪禮，最近仲有一位媽媽表示無法得知兒子遺體嘅下落！其患長期病嘅兒子在2月確診後入院，3日後被指康復出院，但隨即就因病情惡化再度送院。該媽媽懷疑醫院因為兒子嘅長期病患身份而被打發離院，更差嘅係，兒子離世後竟然下落不明。焦急嘅媽媽四處查問兒子下落，各方都表示不清楚或叫佢耐心等待。過了一個多星期後，媽媽才獲警方致電，表示會加快處理移送程序，讓佢盡快領回兒子遺體。

Photo from TVB

確診入院無人理？

節目組早前訪問了陳先生，其85歲爸爸確診新冠入院數日後離世，陳先生表示：「我爸爸離開嘅時候都係著住入院嗰件衫，已經可以證明我爸爸入院四日，都無人幫佢更換衣服。」陳先生質疑院方不但唔好好安置爸爸入病房，更延誤救治。佢甚至不知道爸爸在醫院何處，院方亦無聯絡家屬，延誤處理身後事。

Photo from TVB

除此，有另一名受訪者李小姐表示，佢有長期病患嘅爸爸在安老院舍中受其他確診長者感染，送院後安排混亂，佢爸爸入院翌日被通知可以出院，豈料第二日就發燒，到第三日仲要進行搶救，惟最終因搶救無效而離世。李小姐憶述爸爸入咗院第三日都未上到病房，醫院更指有80多人等待上房。而李小姐到公眾殮房時，更見到周圍仲有十多個同樣未上到病房就離世嘅老年人，場面傷感，連主持吳幸美都聽到眼紅紅。