家族榮耀｜胡卓希梁靖琪玩姐弟戀惹熱議女方親密片流出劇情被指呼應現實？

By Cheryl on 11 Mar 2022

Digital Editor

劇集《家族榮耀》由一班知名演員主演，但當中亦有新面孔令人印象深刻，佢就係飾演金龍太子爺龍文標嘅32歲新晉演員胡卓希（Jason），劇中佢同梁靖琪（Toby）大玩姐弟戀，深情形象令不少觀眾有好感，現實中嘅佢自18歲起便留鬚，背後原因仲好浪漫添！

Photo from 胡卓希 FB

胡卓希演深情暖男惹關注

《家族榮耀》講述多對上流社會情侶嘅明爭暗鬥故事，而其中一對情侶就係龍文標（胡卓希飾）與馬昭慈（梁靖琪飾）。龍文標起初被看成玩世不恭嘅花心太子爺，但同馬昭慈相遇後，就認定女方係生命中嘅另一半，熱烈追求及保護對方，形象深情非常討好。

Photo from 胡卓希 FB

曾剃鬚出演《男排女將》

胡卓希（Jason）身高185cm，留鬚look型格亮眼。其實佢係古天樂旗下天高娛樂藝人，係林峯、周秀娜、黃浩然等人師弟！Jason早前曾出演ViuTV劇集《理想國》和《男排女將》，由於佢在《男排女將》中要演學生，所以佢罕有為角色剃鬚！唔知大家點睇佢無鬚造型呢？

Photo from 胡卓希 FB

原來係千萬MV男神？

除咗劇集，Jason其實都拍過唔少MV，當中代表作有同文青女神袁澧林合演樂隊Dear Jane嘅「都市愛情三部曲」MV：《哪裡只得我共你》、《經過一些秋與冬》及《只知感覺失了蹤》，3部MV都有約千萬點擊，可算係「千萬MV男神」。

Photo from Dear Jane - 經過一些秋與冬 MV

現實中為姐弟戀留鬚？

Jason在《家族榮耀》中嘅留鬚造型相當突出，雖然佢比梁靖琪細7年，但合演情侶毫無違和感。現實中佢同樣留鬚，背後原因更相當浪漫。Jason曾在訪問透露佢18歲時同一個年紀比自己大嘅女生交往，為咗令自己睇落更成熟，同對方更相襯，佢當時決定開始留鬚，並保持造型至今。

Photo from 胡卓希 FB

梁靖琪問過老公先接拍《家族榮耀》

而在《家族榮耀》飾演Jason伴侶嘅梁靖琪，原來現實中有問准過現任老公才接拍聚集，有人認為佢演嘅「二奶女」角色經歷同佢本人有相似之處。「二奶女」馬昭慈為挽救家族生意而同Jason演嘅太子爺龍文標進行政治婚姻，其後在男方誠意打動下，馬昭慈最後被感動。豈料在臨結婚前，昭慈舊情人孫孝明（陳少邦飾）間接令昭慈嘅親熱影片流出，對佢造成嚴重困擾，影響結婚安排。

Photo from 《家族榮耀》

角色同自己經歷相似？

梁靖琪在宣傳劇集時曾表示，馬昭慈同佢本人幾似，做任何事都係為家庭，亦同角色一樣好想爭取爸爸嘅認同。靖琪爸爸係TVB前戲劇分部製作總監梁家樹，媽媽則係TVB藝員部經理蕭笑鳴。梁靖琪在2011年與拍拖一年嘅富豪黃敏豪閃婚，黃敏豪投資獨到，身家兩億。到2012年，梁靖琪到三亞拍攝《衝上雲霄2》時被傳媒拍到同吳卓羲等人，凌晨前往已關閉嘅度假酒店泳池玩，期間被指飲酒、講粗口，佢亦被指身穿性感泳衣同吳卓羲調情。

Photo from 微博

Photo from 梁靖琪 IG

被傳吳卓羲緋聞同離婚有關

到2014年，報導指佢同黃敏豪已離婚並分居多月，有指離婚原因同佢與吳卓羲傳緋聞有關。不過事後佢同吳二人出席活動時，都強調大家只係好似兄妹般嘅關係。梁靖琪在分居期間搬回娘家，亦澄清同黃敏豪係和平分手，當中不涉及第三者。據聞當時女方仍愛黃敏豪，而靖琪雙親同男家父母亦係世交，於是兩家人在新年安排一起打邊爐，希望讓二人復合，但最後失敗收場。