陳國峰疫情下遭遇連串不幸事爸爸染疫離世+工作停頓僅靠TVB收入維生

生活熱話娛樂新聞

By Cheryl on 16 Mar 2022

Digital Editor

疫情下好多藝人工作都受到影響，TVB藝人陳國峰日前在IG發文表示，自今年一月起便進入人生低潮，爸爸不幸離世之餘，自己和媽媽相繼確診，佢同老婆工作亦停頓，現時只能靠TVB人工過活，搞到連食飯交租都成問題。

Photo from 陳國峰 IG

39歲陳國峰2010年參加歌唱選秀節目《超級巨聲2》後加入TVB，之後一直都有拍劇和進行主持工作，並與林盛斌（Bob）等人一起擔任《兄弟幫》主持多年。

Photo from 陳國峰 IG

陳國峰IG透露陷人生低潮

日前，陳國峰在IG貼出一張愁爆相，並表示自一月開始進入「人生絕望低潮」。家人方面，佢爸爸早前在家中跌倒入院，兩日後醫生通知佢爸爸病情轉差，而且送院時已確診新冠肺炎，加上吞嚥問題令食物哽住食道，產生呼吸困難問題，最後在染疫期間不幸離世，而疫情下做白事都要一切從簡，之後佢在IG上載爸爸回憶短片，紀念佢哋嘅父子情；另外，國峰透露佢媽媽亦不幸確診。

Photo from 陳國峰 IG

至於工作方面，佢嘅工作要停頓，收入大減7成，呢家只能靠TVB維生；而從事美容業嘅太太亦已停工2個月，復工無期下零收入，所以佢哋經濟出現大危機，「連交租食飯都成問題」。二人仲需要照顧兩個小孩，但陳國峰最近確診，要自我隔離。

Photo from 陳國峰 IG

曾報名《聲生不息》被拒

去年TVB宣佈與內地芒果TV合作舉辦音樂綜藝《聲生不息》，節目由大台首席創意官王祖藍主理，凡年滿18歲嘅新晉、現役歌手、演藝人員及娛樂圈新秀均可報名參加。陳國峰當時就在IG透露想報名，最後卻被拒參與。之後佢發限時動態大呻：「夢想只係年青人的專利嗎？究竟年滿18歲定義係咩？但係又話我年紀大，唔可以參加。」

Photo from 陳國峰 IG

Photo from 《超級巨聲2》

疫情下要做炒散幫補家計

陳國峰以往有投資拉麵店，但在疫情前已退股。熱愛健身嘅佢在疫情下重操故業，再次做健身教練。佢前年也曾被影到同「綠葉王」莫家淦齊齊做炒散搬貨，日賺900元幫補家計。陳國峰曾向傳媒透露，疫情下要照顧兩個小朋友，經濟壓力好大，所以要出去搵外快，其實佢之前有登記過做職業司機，但最後始終未能過到心理關口而無做。

Photo from 陳國峰 IG

Photo from 莫家淦 FB

保持正面克服難關

陳國峰為家中獨子，面對爸爸離世傷心不已。除此，佢更要面對收入大減問題，同時處理自己與媽媽確診事宜。但即使係咁，佢仍抱照積極面對嘅心態，並在IG帖文中寫下「我都要堅持活著」、「生命只得一次」、「我要做一個盡責父親」、「永不放棄精神」、「疫境自強」。而唔少圈中好友，例如洪永城、陳山聰、姚子羚、孫慧雪、何雁詩等都留言為佢加油，希望佢能克服困境。