長沙灣驚現「上床下廁」奇盤月租$2500 網民批：真係賺到盡！

By Cheryl on 17 Mar 2022

Digital Editor

香港樓價高、租金貴、土地問題嚴重。唔少人唯有租劏房住，近日有業主在Facebook群組放租一個長沙灣「私人空間」，月租僅需2500元，仲標榜有獨立廁所和窗等，但實則間隔係「上床下廁」相當伏，不少網民都留言直斥離譜，直言「唔係人住！」

Photo from TVB

長沙灣有奇盤月租僅$2500

最近，有業主到Facebook群組「自己物業自己放，租買免佣」發帖，表示想放租一個鄰近長沙灣地鐵站嘅「私人空間」，月租2500元，並聲稱設有獨立廁所、冷氣、雪櫃和熱水爐，更標榜為兩層設計及有窗。業主同時上載了數張單位照，照片中可見，租盤間隔其實係「上床下廁」，相當惡劣。

Photo from Facebook @ 自己物業自己放，租買免佣

「上床下廁」間隔，業主被批賺到盡

呢個「上床下廁」設有樓梯往上層，而上層則只放到一張床墊、風扇、小型雪櫃和少許家具，冷氣更會直吹放床位置。

Photo from Facebook @ 自己物業自己放，租買免佣

若有人租住，住客就要睡在廁所上方，亦因為上層樓底矮，所以住客到上層只可以坐，不能站立，更需要屈身坐，有網民批評咁嘅設計有損健康「脊椎都攣埋變鐘樓陀俠」。而業主所指嘅窗，則位於廁所中，上層通用，但窗面積非常小，只能透到少許光線。

Photo from Facebook @ 自己物業自己放，租買免佣

對此，大批網民湧入留言去直批業主無良，質問：「請問呢個空間係比人住架？如果係，我比一個月租金你，你住一個月比我睇」、「只係比瞓公廁好少少」、「呼吸都有味」，亦有網民感歎香港人想住都無尊嚴，更直言：「租個廁所畀人當屋住，仲要收$2500」，有留言則諷刺說：「建議喺塊板度開個窿，屙屎屙尿都唔洗爬落去。」不過，亦有網民認為住呢個空間總好過住太空艙和籠房，又指業主只係提供一個住所，各取所需，唔啱住自然唔會租。

Photo from Facebook @ 自己物業自己放，租買免佣

網民指業主已不是第一次放租

有網民指，呢個租盤早於去年12月已有放租帖文，月租同為$2500，留言問：「咦！呢間閣樓屋又返黎啦？仲未租出咩？」有人回應指，業主都唔好意思將租盤形容為「單位/屋」，而係巧妙稱作「私人空間」，又讚業主再放租係「勇氣可嘉」。亦有人在留言放出一張疑似係同一租盤嘅相片，寫道：「Cls業主」，相中可見上層舖了床墊和枕頭，但空間太細小，所以連床墊都無法完全放直。