Coffee林芊妤晒兒子相片被嫌煩「其實你個仔唔得意」！發長文回應
Coffee（林芊妤）IG除咗做瑜伽嘅照片外，亦不時大晒兒子「伯伯」翟德彥嘅日常趣事。近日有網友私訊佢並直言「其實你個仔真係唔得意」，指唔想再喺佢IG見到佢兒子，Coffee即喺Story公開有關對話。
Photo from Coffee IG
Coffee愛於IG分享兒子「伯伯」日常照
Coffee 2018年誕下仔仔「伯伯」翟德彥後就經常分享兒子嘅日常照。兒子初出生時Coffee曾為佢開咗一個專屬IG，不過後來表示因為仔仔唔中意決定尊重佢唔再更新。
Photo from Coffee IG
Coffee之後就喺自己嘅IG分享仔仔嘅生活照，如今伯伯已經3歲大，Coffee嘅個人IG亦超過103萬個followers，有唔少都係伯伯嘅fans。
Photo from Coffee IG
網民mean爆稱唔想再見到Coffee放仔仔上網
不過亦有網民不滿Coffee日日晒個仔，日前有網民私chat Coffee，表示：「其實你個仔真係唔覺得得意，你成日好自戀你個仔，可唔可以唔好再放上網，其實你啲行為好cheap」，又稱自己無聊先會撳Coffee IG嚟睇但開始頂唔順。
Photo from Coffee IG
Coffee發長文認真回覆
網友言論用字幾mean，Coffee亦唔客氣喺Story公開兩人對話，佢回覆該網民自己無逼人睇佢IG，表示：「我真係覺得我個仔好得意，同埋我真係好鍾意我個仔，所以我嘅IG都充滿着佢嘅足跡」，盡顯母親對兒子嘅愛！
Photo from Coffee IG
稱自己IG中意擺咩就擺咩，獲其他網民力撐
Coffee稱佢從來無要求過其他人都要中意佢仔仔，但佢個人IG想擺咩就擺咩，唔需要他人過問。Coffee又認為既然對方咁睇唔過眼就唔應該繼續follow佢，呼籲對方盡快unfollow。
Photo from Coffee IG
Coffee指好少收到啲message令佢會認真回覆，希望大家唔好因為無聊而嘥時間睇啲唔想睇嘅嘢。佢之後都收到其他網民嘅支持，力撐伯伯帶咗唔少歡樂畀大家，指Coffee唔使理會「無謂人」。
Photo from Coffee IG
曾被指唔識做媽媽，Coffee發火反駁
其實今次唔係Coffee第一次反擊網民留言，之前伯伯因為生牙瘡搞到塊面腫咗，Coffee都被質疑「唔識做媽媽」，當時佢嬲爆回覆斥對方無同理心，當時都獲其他網民力撐。
Photo from Coffee IG
今次事件Coffee有再喺Story表示如果自己IG出post都要考慮他人感受：「咁我咪好唔得閒？」佢又指收到好多人嘅私訊，發現佢哋比自己更激動，佢稱無咁易畀人影響到。
Photo from Coffee IG
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
更多相關文章
Coffee林芊妤晒兒子睇牙醫相被網友斥「要學習做媽媽」，嬲爆回覆超重火藥味
13 Jan 2022
Coffee（林芊妤）不時喺網上大晒兒子「伯伯」翟德彥嘅日常趣事，近日佢分享仔仔個嘴腫咗，之後發現係佢嘅牙齒出現問題，點知有網民留言指佢「要學習做媽媽」，即時令Coffee發火回覆！
Coffee分享兒子「伯伯」近日塊面腫咗
Coffee（林芊妤）2018年榮升做媽媽之後生活一直圍住兒子「伯伯」翟德彥，佢日前透露3歲嘅伯伯出世後第一次去醫院，原因係上唇腫咗，當時醫生話伯伯有傷口發炎。
Coffee表示：「依家佢變咗一隻鴨仔⋯完全唔認得佢，中咗面目全非拳?」，佢又指自己推晒啲會議同工作留喺屋企陪仔仔，Coffee：「想問吓你哋有冇試過咁嘅情況？通常會幾時先好返㗎？見佢隻牙仔都有少少變黑」
發文揭彥彥面腫全因生牙瘡
估唔到佢再次發文指之前喺社交網站分享仔仔塊面腫咗，最近發現原來係因為生牙瘡！佢指發文後有唔少媽媽級網友私訊畀咗好多意見佢，令佢明白事情嘅嚴重性，終於帶咗仔仔去見兒童牙科醫生。
牙科醫生指伯伯有夜晚飲奶習慣，出現蛀牙問題，所以先會生牙瘡搞到塊面腫咗：「所以我今日出呢個post係好想大大力多謝所有私訊幫過我嘅人，都好想多謝偉大嘅網絡世界～令我可以好快咁做每個決定」
有網友留言指責，Coffee即發火回覆
Coffee表示希望透過分享令到所有新手媽媽都有所得着：「凡事要及早了解同認識，我哋繼續學習！」但有網友就留言「教訓」佢：「你真係要好好學習做媽媽﹗個仔搞到蛀牙，又牙瘡你都唔知，又無理佢。」
Coffee即時大怒留言回覆呢位網民：「哇…幾多阿媽會因為畀人咁樣講搞到抑鬱。畀少少同理心啦大佬，第一次做人哋阿媽啫，我唔係唔理係唔識咋奶奶（因為你啲語氣真係好似電視劇啲惡毒奶奶咁）其實把口唔好咁衰，你嘅人生會幸福好多㗎﹗加油。」
Coffee曾被老公教訓要出聲保護自己
其實Coffee之前都有直接回擊網友嘅留言，曾有人指Coffee老公買唔起樓，暗嘲佢「嫁錯郎」，Coffee回覆稱：「我有手有腳鍾意自己賺錢自己洗，我選擇愛情因為我有能力自己買麵包」，隨後更發千字文護夫。
Coffee早前上陳敏之YouTube節目做嘉賓，回憶起曾試過畀人當面話「唔知瞓過幾多個男人」，佢當時無出聲但係老公就鬧咗佢一餐，指佢唔好好保護自己，第時點保護個仔，令佢醒覺應該要有咩不平要出聲學識保護自己。
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
