淘大食好西！少女最愛美女與野獸粉紅玫瑰櫻花冰～推介榴槤飄香冰！

九龍灣淘大商場有好多好野食，小編發現有間叫金滿堂嘅甜品，位於淘大商場一個比較隱蔽嘅位置，店舖既甜品標榜少甜低糖，所以食得多都唔會覺得膩，對女士來講仲無咁容易肥呀！

呢個樣貌出眾嘅粉色甜品叫做美女與野獸，小編就唔係好睇得出點解叫呢個名，不過味道唔錯，可以一試！

裏面有玫瑰櫻花刨冰、士多啤梨雪糕、蘆薈同埋小丸子，呢幾款食材都係女士們最愛，甜品表面仲有玫瑰花瓣乾作為點綴，賣相吸引。

玫瑰櫻花冰食落帶有少少花香味，而且甜度適宜，小丸子煙韌有咬口，加埋蘆薈食配合得唔錯，如果可以加些少鍊奶，相信會更加香口～份量適中，兩個女仔share都可以！

另外，小編都推介呢度既榴槤飄香，雖然外貌並不討好，但係擺落口真係有驚喜，榴槤肉加冰攪拌成碎，同爽口既蘆薈、西米一齊食，夏天食感覺好清爽，口感相當唔錯！

旁邊食唔到榴槤嘅同事一聞到，就表示好臭，榴蓮味相當濃郁，但係食得榴槤嘅朋友就會食到個種濃烈嘅榴槤肉香味，值得推介！

下午茶時間會有優惠，美女與野獸都係34蚊，價錢尚算親民，唔少街坊都有好評。

地址:
九龍灣牛頭角道77號淘大商場二期地下G201號舖

電話號碼:
2751 8900