Tyson Yoshi不滿女友外貌被批 Man爆開直播護愛人：我鍾意就得！

歌手Tyson Yoshi（程浚彥）和女友Christy交往4年恩愛非常，女方最近被網民指外貌一般，更形容佢係「靚版馬蹄露」，Christy都在社交網大方答謝，被外界大讚EQ高，而Tyson日前就在IG開直播發言護愛人，直言：「佢外表如何，我鍾意就得！」

Photo from IG@c.705

Tyson Yoshi女友外貌被網民評論

現年27歲Tyson Yoshi在3年前為女友寫出《Christy》一曲大受歡迎，雖然Tyson外表走壞男孩風格，但其實佢非常專一，兩人拍拖4年至今非常甜蜜，而女方都受到品牌青睞，不時有廣告邀約。但近日有網民在討論區發文，直言Christy顏值低，更上載其他網民話佢似「靚版馬蹄露」嘅留言截圖，圖中可見，Christy都親自大方回應「多謝」，帖文引來熱議。

Photo from 《Christy》歌曲封面

Photo from IG@c.705

對此，有網民同意樓主睇法，但亦有唔少網民不解為何要刻意討論Christy嘅外貌，亦稱讚Christy嘅回應EQ高，而帖文樓主則解釋，對方「出得嚟接job接廣告做KOL，就預左有機會被人批評。」

Photo from IG@c.705

Tyson Yoshi開直播護女友

至於Tyson Yoshi，當佢獲悉女友被公開批評後相當生氣，更在IG開直播評論事件，當中佢連環爆粗，仲要不斷飲水降火，對於女友外貌被批，佢直言：「咁點呀，我鍾意呀！出名就要被人『鬧』？」佢又指自己能夠理解「人紅是非多」道理，但作為一個男朋友就要發聲，「你試吓行行吓街、拖拖吓手，突然有個幪面人話你外表差、之後有一大班唔知喺邊條巷走出來嘅人，叫你企喺度，辯論你個樣好唔好睇... 睬你都傻啦，現實生活可以直接走！」

Photo from IG@tysonyoshi

Tyson續指，網民在討論區可以討論好多嘢，但如果被評頭品足嘅人心態唔夠強、企得唔夠硬，做傻事「走咗」點算，佢認為網民匿名並非代表唔使負責任，又言韓國已發生過許多網絡欺凌嘅不幸事件。Tyson更Man爆坦言：「佢外表如何，我鍾意就得！我當然要企出來，保護身邊人都做唔到，點做男人！」

Photo from IG@tysonyoshi

希望網民可以設身處地考慮別人感受

Tyson認為音樂和外貌不是一門競技運動，質疑網民為何要強烈批判，亦希望大家可以轉為討論真正有用嘅事，並將負能量變為正能量。佢亦表示，好彩女友夠堅強，「若果佢唔開心，走咗去，咁點呀？」、「呢個已經唔係我女朋友一個人嘅事，大家設身處地諗吓！」

Photo from IG@tysonyoshi

網民大讚：真男人！

Tyson開直播後，再po出一首歌曲作品，歌詞包括：「有禍等我背」、「在你的世界下了一場大雨，在模糊的視線，也必須撐下去。」真係非常支持和保護女友，所以粉絲都留言支持Tyson護花，同時大讚佢係「真男人」。

Photo from IG@tysonyoshi

相關文章：Coffee林芊妤自爆過往愛情經歷！被離巢前男友傷透心：已經決定要做老姑婆！

相關文章：MC張天賦再被揭有新歡？！女方有男友，網友憑自拍照踢爆兩人關係非一般

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）