國泰航空重啟「見習機師培訓計劃」中學畢業可申請網民：不如請返被裁員工！

By Cheryl on 29 Mar 2022

Digital Editor

新冠疫情肆虐令航空業受挫，國泰航空前年宣布裁員8500人，自2020年3月起亦暫停了見習機師培訓計劃。不過，國泰日前宣布重啟上述計劃，今次更會同香港理工大學合作，發展全新綜合機師培訓課程，目標於2025年前招募及培訓逾800名見習機師。計劃雖然對有興趣人士來說非常吸引，但網民卻有其他意見，直言：「有無諗住優先請返前年被炒嘅人？」

Photo from 國泰航空Facebook

國泰前年曾作大規模裁員

全球疫情影響下，近年國際航班大幅減少。香港國泰航空於2020年決定削減8500個就業崗位，而旗下擁有35年歷史嘅國泰港龍航空亦要即時結業。當時，相關員工對集團決定都感到非常突然，同時感到前路茫茫，憂心不已。

Photo from 有線新聞

國泰重啟「見習機師培訓計劃」

國泰嘅「見習機師培訓計劃」同樣因疫情而在前年3月起停辦，不過，有唔少國家開始採用與病毒共存政策，全球航空業開始復甦。國泰在日前都正式宣布，集團將重啟「見習機師培訓計劃」。

Photo from 國泰航空Facebook

國泰今次同香港理工大學聯手發展全新嘅綜合機師培訓課程，希望為香港年輕人提供專業培訓，並為課程導師、培訓指導及其他間接崗位創造本地就業機會，目標於今年培訓190名學員，並冀在2023年至2025年間，具能力每年培訓240至300名見習機師，名額較2019年已培訓嘅180名見習機師為多。

Photo from 《夢想飛行Good Luck》劇照

國泰表示，加入計劃嘅學員將會進行為期50至60周嘅培訓，期間由理大教導理論課程，學習成為營運區域、長途和超遠程航班嘅飛行員。合格學員將赴澳洲阿德萊德，或美國鳯凰城接受飛行訓練，最後回港於國泰城接受多組員模擬駕駛艙訓練。

Photo from 國泰航空Facebook

申請者將需打齊3針

申請者需為香港18歲以上永久性居民，中學畢業，英文和數學或科學成績良好，如有航空課程學位將獲優先取錄，亦需達到ICAO（國際民用航空組織）英語語言能力4級或以上。除此，由2022年6月1日起，所有國泰員工都必須已接種第三針新冠疫苗，如有合理醫學原因不能接種，則可獲豁免。

Photo from 《夢想飛行Good Luck》劇照

網民：不如請返被裁員工？

宣布計劃重啟嘅帖文一出，很多網民都湧到國泰Facebook專頁留言，不少人都未有忘記前年有大批員工被炒嘅畫面，建議不如請返早前被裁嘅港龍機師，又言：「其實你哋真係識計數，炒咗班舊嘅再請返啲新嘅，慳番好多」、「當年港龍成批同其他機師空姐空少話炒就炒，連停薪留職，再請返人都唔肯。」唔知大家又點睇，覺得國泰應否優先聘請返受裁員潮影響嘅員工呢？