徐子珊息影3年罕有露面出席慈善晚宴！歌影視三棲發展，曾傳6段緋聞

現年42歲嘅選美冠軍徐子珊自2019年宣佈息影後就甚少公開露面，似乎決心過普通人生活。近日佢罕有露面為慈善活動拍宣傳片，並將現身出席馬來西亞舉行嘅晚宴，掀起網民關注。

徐子珊入行15年宣佈息影

徐子珊喺海外升學之後回流香港，佢於2004年參加選美並成為四料冠軍後簽約入行，佢長達15年嘅演藝生涯喺歌影視3方面都有所發展，不過為咗進修心理學佢決定淡出娛樂圈。

歌影視三棲發展

徐子珊卸任後就開始出演電視劇，主演過唔少劇集，出道2年就獲飛躍進步獎，其中佢更於2012年奪得最喜愛女角色獎。主力喺電視圈發展嘅徐子珊2007年擔任由杜琪峯監製嘅電影第一女主角，並憑此勇奪第27屆香港電影金像獎「最佳新演員獎」。

徐子珊更進軍樂壇，更橫掃2009年四大音樂頒獎禮中嘅新人獎，佢係香港少有喺歌影視都有所成就嘅女演員，不過佢2015年起修讀專業珠寶設計及彩色寶石專業課程，之後再進修心理學碩士課程，終於2019年息影。

息影3年公開露面出席慈善晚宴

息影至今已3年，徐子珊少有現身幕前，仲注銷埋Facebook、IG帳號，微博亦無再更新，佢曾經為關禮傑老婆梁安娜（Anna）慶祝生日，佢罕有於合照中出現，當時佢面型瘦削不少。

事隔近一年，徐子珊再次露面，佢為慈善活動拍宣傳片，佢於片中透露自己將會出席一個慈善晚宴，目標係可以籌到100萬令吉（約$187萬港元），希望大家多多支持。晚宴將於4月1日喺馬來西亞舉行，片中徐子珊狀態好好，與息影前無咩分別。

曾與天王、老闆傳緋聞

回顧佢15年演藝生涯，原來曾經傳過至少6段緋聞，有唔少緋聞男友背景超強！其中連天王黎明都有份，喺徐子珊當選後與天王黎明合作拍攝廣告，兩人傳出戀情但徐子珊並未承認，緋聞亦被黎明唱片公司否認，直至黎明與樂基兒結婚呢段緋聞先告一段落。

2010年徐子珊同老闆「殼王」陳國強傳出緋聞，當時佢啱啱進軍樂壇，其後佢有多套電視劇播出，有指佢係因為獲老闆器重，備受力捧。

與同劇男演員傳戲假情真

徐子珊同馬德鐘合作拍電視劇傳出緋聞，其後佢同吳卓羲合作時傳出因戲生情，拍吻戲時更情不自禁。除咗馬德鐘同吳卓羲，徐子珊同林峯、黃宗澤合作拍劇又傳戲假情真，但佢未有承認過戀情。

息影後徐子珊至今仍然單身，有傳曾經有電視台重金禮聘邀請佢「復出」，但徐子珊仍不為所動，似乎無意再回到幕前，決心過平凡生活。

相關文章：四大花旦13年對比！鍾嘉欣兒女雙全/單身徐子珊淡出娛樂圈

相關文章：徐子珊攻讀心理學博士、張玉珊成最年輕上市公司主席！7位息影藝人成功變身女強人！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）