360秒人生課堂｜醫生媽媽辭職照顧自閉症兒子曾一度崩潰，靠母愛+老公激勵重新振作！

By Cheryl on 15 Apr 2022

Digital Editor

TVB新節目《360秒人生課堂》由林盛斌（Bob）主持，每集都會邀請不同人士進行6分鐘演說，透過講述自己人生經歷來感動觀眾。新一集就有一名醫生媽媽分享照顧患自閉症兒子嘅辛酸故事，不少現場觀眾都聽到熱淚盈眶。

Photo from 《360秒人生課堂》

醫生媽媽辭職照顧自閉症兒子

節目中，一名叫黃溢妮（Stephenie）嘅媽媽運用360秒即6分鐘時間大談自身經歷，佢本來係一名專科醫生，佢同從事金融業嘅老公Alan育有兩名子女，當中嘅8歲兒子顥之患有自閉症，佢不懂說話，認知能力也只有三至四歲。兒子未夠兩歲時，Stephenie已知道佢有中度至嚴重自閉症。但Stephenie無放棄，更決定辭掉工作照顧顥之，每日同佢一起做訓練。

Photo from 《360秒人生課堂》

難搵學校感沮喪

Stephenie表示，不少自閉症孩子都容易激動，難以跟別人合作，但顥之卻很聽話，可惜能力不高，很多簡單指示都要經長時間訓練才有進步。之後，顥之因學習能力問題無法進入正常學校，同時被醫生評估需入讀中度智障特殊學校。Stephenie一時無法接受，於是搵咗間專為自閉症小孩開設嘅學校，但面試過後，該校老師卻指顥之能力唔適合入讀此校，Stephenie因此非常失望，更因此哭了很多次。

Photo from 《360秒人生課堂》

兒子曾當眾大便

一次，Stephenie跟朋友帶了顥之到一間私人會所嘅兒童遊樂場玩耍，當時5歲但智商僅3歲嘅顥之正值學習上廁所時期，Stephenie一不留神，就發現兒子站在繩網中間，脫了褲子當眾大便，事後更將糞便掉到周圍都係。

Photo from 《360秒人生課堂》

Stephenie當刻不知所措，又怕會被人拍片放上網，所以一路低著頭，唔敢望周圍，一路爬上繩網幫忙清潔，又跟職員道歉，而佢老公就一手抱走兒子，帶佢到更衣室洗澡。當晚，Stephenie回家即衝入房大喊，佢深感挫敗和無地自容，心想：「我兒子得5歲，人生仲有咁長，係咪都要一直發生呢種事？」

Photo from 《360秒人生課堂》

靠老公一番話從新振作

正當Stephenie自認為處理和面對不到兒子嘅事，老公Alan就給予鼓勵，坦言：「我唔太介意別人點睇我，而且剛才一啲都唔丟臉，我仲覺得自己好有型添，周圍嘅人應該讚我呢個爸爸，將如此尷尬嘅事處理得咁好。」Alan續稱，即使兒子正常，長大後可能都會學壞，但顥之就好乖，而且佢會陪你一世。Stephenie頓時被「點醒」，重新有了希望。佢又指，嗰次對話後已完全釋懷，又認為顥之令自己學懂了感恩，令家庭充滿愛。