港男被女友質疑仍愛前度感委屈！堅稱只愛現任但視ex為重要朋友

時事熱話

By Jennifer on 22 Apr 2022

Digital Editor

今晚食乜餸：小二，嚟一碟花生！

知道另一半同前度仲有聯絡的確係一件令人傷心嘅事，日前討論區有網民就發文呻女友成日覺得佢同前女友餘情未了，令佢十分煩惱，但網民睇完女友生氣嘅其中2個原因後卻一致怒斥網民不顧女友感受仲扮晒深情？！

港男與女朋友為前度女友吵架

連登討論區有網民開post「我女朋友仍住我同ex有嘢」，樓主表示同女朋友拍拖一年半，期間經常為咗前女友嗌交，即使佢多次強調已經對ex無晒感覺，依家愛嘅人只有女朋友，但女朋友仍然覺得佢同前度餘情未了，令樓主十分無奈。

女朋友不滿港男繼續用前度送畀佢嘅禮物

樓主向網友分享佢同女朋友嘈嘅原因，其中一樣係女朋友不滿佢仍然保留前度送畀佢嘅禮物，更照常咁使用，當中包括銀包、手機殻、背囊等等，樓主表示自己最初無諗住主動同女友講啲嘢係前度送嘅禮物，但後來有次女友問完佢啲嘢喺邊到買，知道之後就嬲咗佢。

樓主稱有同女友解釋所謂嘅「前度禮物」對佢嚟講只係一件物件，用緊嗰陣完全唔會諗起前度女友，但最後嗌完交樓主都妥協咗，但佢就呻女友無送返啲新嘢畀佢用：「最後係我出錢重新買返哂啲嘢」

港男與前女友相約打機被女朋友發現

另外一件事就係前度女友偶爾會搵樓主一齊打機，樓主強調係「成班人咁打」，表示佢同前女友各自開展新戀情之後都有避忌，無單獨出過去，對話內容都好正常。但有次女朋友撳下樓主部手機時見到前度send message問佢打唔打機，女友即嬲爆爆咁搶咗部手機覆佢，叫前度唔好再煩住樓主。

樓主發晒脾氣，佢指因為女友問都無問就攞咗佢部手機覆人，但女友堅持自己咁做無問題，又「講咗好多非常難聽嘅說話鬧我哋（樓主同前女友）」，樓主同女友嘈更被女友斥係想維護個ex。樓主指長期被人質疑嘅感覺好難受，雖然有諗過分手但又唔捨得：「到底有咩方法可以解決到依個問題。」

網民認為女友質疑有道理

呢個post掀起網民熱議，但大部分都唔認同樓主，「負皮」近2,000！其中一個最多正評嘅留言係「真係無咩理由唔質疑你」，樓主即問點解，有網友認為雖然信任係好緊要，但易地而處佢都未必可以信另一半同前度仲有聯絡只係為咗打機咁簡單。

港男視前度為重要朋友被網民鬧爆

樓主反駁指佢唔介意女朋友同前度傾偈，有網友回覆表示每個人條線都唔同，始終前度呢個身分同普通異性朋友唔一樣，女朋友可能接受唔到佢同前度有任何聯繫，只能雙方為大家退讓一步。樓主指前度依家都有男友，但被佢女朋友鬧完都唔開心咗幾日，樓主稱：「佢（前度女友）私下搵我我仲唔覆佢=我要預會無咗個fd」

樓主呢個回應即時引起網民極大反應，有人指：「你好缺朋友？為咗現任感受唔同ex做friend會死？」更有網民直言：「分咗手就係唔畀做朋友！」但樓主就表示自己一路有同前度避嫌，已經無同佢單獨出去，但要佢同前度絕交就做唔到：「我無辦法因為咁無咗個咁重要嘅朋友」

港男堅稱好愛現任女友

網民即鬧爆佢重視前度多過現任，應該要放過佢女友即時分手。樓主堅稱佢好愛現任女友，但同前度經歷過好多嘢，佢哋係和平分手，只係大家平淡到無咗愛情，要搵個明白大家嘅朋友真係唔多，所以視對方為「重要嘅朋友」。但網民就反駁呢個係自欺欺人嘅講法，依家介意嗰個係佢女友，重點係樓主做嘅行為觸及女友底線，一日唔改女友一日都會嘈，想解決唯有分手，指佢唔識企女友角度諗：「你應該好自我中心嗰啲人，唔識企喺人哋角度諗，成熟啲啦。」

港男回應事件終得解決：多謝咁多位點醒我

網友一面倒斥樓主覺得前度重要過女友，有晒自己立場仲上討論區扮深情問意見。眼見「群情洶湧」，樓主再回應表示「好多謝咁多位巴絲鬧醒我」，佢指知自己過份咗，一時燥底係因為女朋友比較大頭蝦又有啲公主脾氣，佢有感自己喺呢段感情係付出較多嘅一方，所以喺呢件事上想女友讓步，樓主稱已同咗女朋友達成共識，都同咗前度講唔好再私下傾偈，而女朋友想幾時check手機就幾時畀佢睇。