戴耀明自爆曾借醉表白佘詩曼阿佘曾同鄭嘉穎拍拖情史勁對象全部係男神？

By Cheryl on 22 Apr 2022

Digital Editor

戴耀明曾在訪問中自爆暗戀佘詩曼多年，更曾誓言要娶佢為妻！佘詩曼曾傳過多段緋聞，對象中有不少男神，包括林峯、張智霖等，更同過鄭嘉穎拍拖，名單好有睇頭~

Photo from 佘詩曼微博

戴耀明曾自爆暗戀佘詩曼

有「綠葉王」之稱嘅戴耀明未必有主角相，但出演過多套劇集嘅出位配角，亦因為外貌酷似「一拳超人」而為人熟悉。將近50歲嘅佢在感情路上未有著落，多年前佢曾自爆暗戀佘詩曼。佢2004年拍攝《金枝慾孽》時認識對方，戴耀明當時更常向女方講：「我賺到錢會娶你做老婆。」

Photo from 《360秒人生課堂》

曾借醉表白，認為成功率有50%？

佢表示，「娶老婆」言論係不負責任，雖然無實際行動追過阿佘，但佢試過借醉示愛，傳短訊給對方稱：「我好掛住你。」戴耀明坦言渴望得到愛情，又大讚阿佘係心中女神：「佢係一個好正嘅女人，我相信好多人跟我一樣，有娶佢嘅諗法。講出嚟就有50/50機會，唔開聲嘅話永遠都係零。」

Photo from TVB

雖然阿佘未有跟佢交往，但二人仍是朋友。有人認為戴耀明太愛挑戰，佢追阿佘猶如不可能的任務，但亦有人欣賞佢嘅勇氣，並祝福佢早日搵到真愛。

佘詩曼緋聞對象多為男神？

阿佘入行多年來由過唔少緋聞，當年佢出演經典劇《十月初五的月光》時，就被傳同張智霖有曖昧，但當時男方已跟袁詠儀蜜運中，所以曾引起爭議。

Photo from TVB

多年後始知張智霖被誤傳

到15年後，該劇推出電影版時終真相大白，薛家燕澄清其實當年力追阿佘嘅人係唐文龍，而當年被誤傳嘅張智霖更直言：「終於還我清白！」唐文龍聽罷都覺得尷尬，但佢亦無否認當年追求失敗嘅事，仲有傳聞指，唐文龍因此事更缺席了當晚慶功宴。

Photo from 唐文龍 FB

曾與陳浩民交往

阿佘在2002年曾與陳浩民合作拍電影，二人曾被指有曖昧對話，並已「老公老婆」互相稱呼，惟關係維持不久便分手收場。多年後，阿佘曾透露當時專注香港發展，而陳浩民則要上內地發展，長期異地戀下唯有終止關係。陳浩民現在已經成家立室，亦經常在社交網分享家庭溫馨點滴，非常幸福。

Photo from TVB

Photo from 陳浩民

曾拒絕林峯追求？

阿佘和林峯曾多次合演情侶，在《使徒行者》嘅演出引起不少話題，兩人相當默契。林峯曾表示在眾多合作過嘅女星中，同佘詩曼關係最要好。曾有傳言指林峯追過阿佘，但最終都被拒絕。

Photo from TVB

Photo from 佘詩曼微博

曾同鄭嘉穎擦出愛火花

佘詩曼曾與鄭嘉穎合作演出《法政先鋒2》，並傳出戀情。二人更在戲外節目與活動上有親密舉動，例如鄭嘉穎在節目上喂佘詩曼食嘢，又在頒獎禮上獻吻等，惟戀情最後僅延續了一年。對此，二人都有共識表示分手出於時機問題，導致關係不能作進一步發展。但鄭嘉穎都大方表示佢哋還是朋友。如今，男方已同陳凱琳結婚，育有子女組成幸福家庭。不少人都祝福阿佘在不久將來都會找到其真命天子。