【聲生不息】曾比特首戰唱贏人氣歌手獲「排名第一」！炎明熹獲多位前輩盛讚成功入圍

By Stephanie on 25 Apr 2022

Digital Content Writer

中港聯手打造嘅音樂綜藝節目《聲生不息》昨日（24日）首播，參加嘅歌手包括有：林子祥、葉蒨文、李克勤、楊千嬅等人，陣容鼎盛。當中資歷較為淺嘅2位，炎明熹（Gigi）以及曾比特嘅表現獲得內地網民關注，並且於首輪PK賽中獲勝，取得入圍資格！

Photo from 《聲生不息》

音樂節目《聲生不息》一共邀請咗16位歌手出演，而首輪比賽就將參賽者們分為男女兩隊進行比賽，而賽前就已經預先進行「期待值」測試。若果於PK賽中獲勝就能夠奪取對手嘅期待值指數，比賽完結時獲得最多「期待值」嘅就勝出首輪比賽！由下圖可見，當時Gigi排列於女生尾二；而曾比特就排行第5，不過二人嘅出道年資同其他出演者的確有差別，所以亦尚算正常。

Photo from 《聲生不息》

炎明熹賽前獲大前輩們力撐！

喺女生隊伍連續勝出2局後，Gigi乘勝追擊以女子隊第3位參賽者出場，演唱已故歌手陳僖儀嘅歌曲《蜚蜚》。雖然佢嘅期待值指數並唔高，但賽前就獲得樂壇大前輩張學友、莫文蔚等為佢撐腰，而且主持人仲以「絕對係王祖藍的驕傲」形容佢！值得一提嘅係張學友及譚詠麟都係環球唱片旗下歌手，但佢哋卻選擇讚揚Gigi，而並未有對門師弟曾比特作出如此落力嘅支持。

Photo from 《聲生不息》

演唱《蜚蜚》獲網民大讚

年紀尚輕嘅Gigi表演《蜚蜚》之前顯得有啲緊張，但到真正表演嘅時候並冇怯場，成功維持水準，真假音轉換得非常流暢！唔少網民都稱讚Gigi表演超乎如期，「第一次聽她唱歌」、「唱出自己嘅風格」等評價。最終，佢亦於對決中獲得勝利，成功為隊伍爭取分數！

Photo from 《聲生不息》

曾比特靠髮型成為焦點？！

另一方面，今年初獲得「叱咤樂壇生力軍男歌手銅獎」曾比特因為資歷尚淺，大前輩們以及內地網民都似乎對佢唔太熟悉。而佢自己亦表示特別嘅髮型係佢備受關注嘅原因，「我的頭髮好受歡迎，好多歌手朋友都來問我『這是真髮嗎？』，每個都來摸我的頭髮，然後變成朋友。」笑言靠髮型認識朋友，而李玟亦有於節目摸佢嘅頭，場面搞笑！

Photo from 官方照片

Photo from 《聲生不息》

演唱《初戀》突圍而出，獲票選成為「全場排名第一歌曲」！

曾比特於對賽中遇上內地歌手安崎，而安崎本身因為參加真人選秀節目《青春有你2》而人氣超高，而對手嘅期待值係女參賽者中排行第1位！不過，曾比特選擇獻唱《初戀》，靠超卓嘅實力以及可愛嘅舞步，成功令網民另眼相看，仲獲現場觀眾投票勇奪「全場排名第一歌曲」！節目播出後，曾比特嘅表演都登上微博熱搜榜，獲得網民們嘅關注～