荃灣豬肉檔AK阿威紅到拍廣告，保持專業形象唔除口罩，FANS名叫「威威豬」！

荃灣街市豬肉檔AK阿威嘅討論度真係超高，日日都有唔少粉絲過黎搵佢影相。Facebook嘅「荃灣鮮肉威威應援團」，群組成員已經達一萬四個！唔止各地女街坊比佢迷倒，連男士都經常曬出同阿威嘅合照，佢地黎緊仲會集資幫阿威搞生日應援？早前已經有消息話佢簽咗經理人，今次直頭有廣告接呀！

Photo from 品牌廣告照

阿威日前接拍咗佢第一個廣告，可以話係佢嘅出道作！佢今次接嘅係工作鞋品牌嘅廣告，鞋款主打抗滑、分散壓力，適合長時間站立同行走。街市環境難免比較濕滑﹐阿威無疑係最好嘅代言人！

Photo from 品牌廣告照

阿威坦言揀工作鞋一定要舒適同抗滑，仲話對腳真係無咁攰，每一步都踩係枕頭咁，叫粉絲們可以放心啦！

Photo from 品牌廣告照

阿威爆紅唔係剩係因為型仔架，未出名前街坊已經話呢個店員好有禮貌！就算面對咁多街坊搵佢合照影相，阿威都係友善對待無托手肘！早前母親節仲準備咗花送比街坊呀，真係超暖心！

Photo from Facebook群組 荃灣鮮肉威威應援團

佢更加謙虛表示：「全靠『威威豬』（粉絲暱稱）支持，我相信用心去做就係專業，係街市嘅行業都唔例外。」所以阿威次次都會執到靚一靚返工，著到整齊企理，仲話依家連工作鞋都有專業裝備加持呀！」

Photo from Facebook群組 荃灣鮮肉威威應援團

網民話阿威真係愈黎愈有明星相，仲話佢係「男人天花板」！可能係因為染咗頭髮，仲每日返工前都仔細gel咗頭啦！

Photo from Facebook群組 荃灣鮮肉威威應援團

就算出咗名都一樣親民貼地，得威威先可以駕馭到係廣告背景係一排排豬肉！仲希望阿威愈接愈多廣告呀！

Photo from Facebook群組 荃灣鮮肉威威應援團

Photo from Facebook群組 荃灣鮮肉威威應援團

黎緊6月8號係阿威嘅生日，聽講群組成員仲話要集資幫阿威搞電車應援同巴士應援，要將荃灣變做威威灣呀！

Photo from Facebook群組 荃灣鮮肉威威應援團

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物嘅資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

更多相關文章

荃灣街市豬肉檔型男店員出沒！激似AK、張天賦、羅志祥？

04 May 2022

近日係FB群組「荃灣人」流傳荃灣街市有型仔店員出沒，事主仲勁開心上傳合照，可見圖中店員濃眉大眼，就算戴住口罩都覺得係個型男，唔怪得一班家庭主婦咁熱烈討論啦！即睇豬肉檔到底係邊！

Photo from Facebook群組 荃灣人

買餸偶遇SSR級靚仔豬肉佬

女網民在帖文中表示自己少去買餸，無諗過會見到咁靚仔嘅豬肉佬！並隨帖附上合照，一出就引起大批荃灣街坊留意～男店員染一頭金髮，一對大眼有神又深邃，著住反領Tee同戴銀鏈耳環，有打扮過絕對唔係我地平時見嘅豬肉佬，就算戴咗口罩都覺得會係一個型男呀！合照中樓主以心心眼emoji遮咗自己個樣，但就算隔咗個emoji都感受到佢興奮嘅心情呀！

Photo from Facebook群組 荃灣人

店員唔止靚仔仲態度好

睇完圖片一眾街坊當然想知邊到先會見到靚仔店員，一番追問下終於得知係，即楊屋道街市對面兩條街嘅「鮮味」豬肉檔。及後又有網民留言，指男店員唔止幾靚仔仲幾好人，有次去買豬肉仲教佢點煲湯，仲有網民話佢係「漆黑中的螢火蟲」，靚仔又態度好，呢個形容真係當之無愧！

網民大讚有明星相

唔少網民更加表示「mirror執漏咗一子」，指佢粗眉大眼，同Anson Kong＠mirror有啲似，又有網民話係似小豬羅志祥，仲有網民話同MC張天賦都似呀，所以就出現咗「楊屋道AK」、「荃灣小豬」等等嘅花名！但唔理似邊個，總之都係似係靚仔，有明星相啦！更加有網民誇張咁講為咗見店員哥哥，黎緊一個月要要煮豬全宴！但亦有清醒派嘅網民話要見一見真面目，除咗口罩先知係咪真係靚仔！

Photo from 羅志祥 IG

Photo from MC張天賦 IG

Photo from Anson Kong IG

專程幫襯卻失望而回

有女街坊睇到post後專程去「鮮味」豬肉檔，諗住會一會靚仔店員，點知就有緣無份，不過都照買咗一份豬肉支持下，係同一群組發帖表示「專登搵靚仔買豬肉，點知變咗個阿姐，小豬去咗邊？」，剩係睇圖都感受到事主有幾失望。不過就有唔少網民回覆，有網民話靚仔店員可能係太子爺，只係間唔中落場幫手，亦有網民話成日經過都見到佢鋪，可能只係咁岩放假，仲叫街坊們唔好放棄呀！

Photo from Facebook群組 荃灣人