森美稱豬肉男神阿威「豬肉佬」被轟！網民反應兩極，粉絲：稱呼唔尊重

森美不不嬲都係金牌DJ，出名風趣幽默，細細個就聽佢既電台節目大！佢另一樣出名嘅就係言論出位搞到成日要道歉！繼之前被聽眾投訴後，最近又因為稱呼近日爆紅嘅荃灣豬肉檔AK阿威做「豬肉佬」，搞到一班粉絲「威威豬」話佢唔尊重？

Photo from 森美IG ＠sammy903

森美稱「豬肉佬」被轟

近日森美係報紙專欄到隨筆寫咗一篇以「豬肉佬的魅力」為題嘅文章，內容大概係話好開心係沉悶嘅社會環境之下有野可以令香港人開心下，阿威爆紅令咁多位老公突然間四面受敵！仲話阿威咁紅都不足以為奇，如果係街市工作嘅型男真係順網民意組到隊「SuperMarket」，仲會即刻幫佢地宣傳！

Photo from 森美IG ＠sammy903

不過有阿威嘅粉絲（威威豬）睇完就覺得唔高興！佢地話剩係見到標題已經唔想睇內容，話覺得森美完全無尊重其他人，仲話佢點解成日都係咁！都有網民認同話成日叫人XX佬，唔通想人地稱呼佢做電台佬、DJ佬！

Photo from Facebook群組 荃灣鮮肉威威應援團

Photo from Facebook群組 荃灣鮮肉威威應援團

Photo from Facebook群組 荃灣鮮肉威威應援團

不過另一邊網民就唔認同佢地嘅睇法，話「豬肉佬」呢個名其實好貼地，叫乜乜佬本身就無貴賤之分，係咁多位護威心切嘅威威豬諗多咗，仲話篇文章其實幾寫實，講咗咁多位丈夫嘅心聲！

森美經常因用詞不當道歉

雖然好多人欣賞森美咁有特色嘅個人風格，不過都有唔少人接受唔到佢嘅幽默，所以經常因為用詞不當收到投訴！特別有幾單仲搞到大件事！

最近佢係商台節目因為重複用「戇居者有其屋」令居屋業主有唔好嘅觀感，連通訊局都向商台發出勸喻，事後森美回應會檢討，不過就表示自己只係想玩「食字」，但知每個人都有自己唔同睇法，會尊重所有聽眾嘅睇法，希望每個人都可以開心同舒服咁聽電台節目。

Photo from 森美IG ＠sammy903

最轟動嘅一單一定係2006年係《架勢堂》入面大談涉及不雅嘅香港女藝人選舉，被11個婦女團體同唔少市民投訴，最終搞到節目要停播兩個月，森美同拍檔小儀要停薪留職兩個月，仲因為咁無左中文大學兼職講師嘅教席！

Photo from 森美IG ＠sammy903

到2010年係《早霸王》同聽眾討論養狗嘅問題，聽眾其實講緊最近養左隻狗同初生囝囝相處得好好，但森美就搞氣氛咁勸聽眾要小心BB比狗咬，話狗始終係動物，可能會獸性大發！呢件事被好多愛狗人士聲討，要求佢停止發表曲解狗隻嘅言論！

Photo from 森美IG ＠sammy903

關於狗隻嘅事件唔止咁，2011年都試過係節目中討論食肉類嘅問題，佢話比較鍾意靚嘅野，仲話如果狗既品種全部都係唐狗就食得安心！食狗論引來愛狗人士強烈譴責，仲有人帶埋唐狗去廣播道聲討森美！最後都係要公開道歉！

Photo from 森美IG ＠sammy903

網民話今次係因為阿威近排爆紅先會有爭執發生，平時都係咁叫街市既店員，仲話阿威已經開左個人Youtube、IG，睇黎要正式出道啦！

Photo from 阿威 IG ＠waiwai_608

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）