英國男子收留烏克蘭難民後拋妻棄女！與美女相處10日堅決私奔

時事熱話

By Jennifer on 23 May 2022

Digital Editor

今晚食乜餸：小二，嚟一碟花生！

【俄烏戰爭】俄羅斯烏克蘭衝突持續，英國傳媒報道一位29歲男子Tony與佢嘅伴侶Lorna收留22歲嘅烏克蘭難民Sofiia 10日後，Tony就決定拋棄8年感情嘅妻女，同Sofiia私奔，掀起網民關注。

Photo from 《The Sun》

英國男Tony收留烏克蘭美女難民

俄烏戰爭至今已有3個月，唔少當地居民都紛紛逃至鄰近嘅各個城市。據英國《太陽報》報道，29歲英國男子Tony本來簽署咗收容難民協議，但認為申請過程太慢，於是喺社交網站提供幫助，Tony認識咗22歲嘅烏克蘭人Sofiia，並提出要支持幫助佢。

Photo from 《The Sun》

不過Tony 28歲嘅伴侶Lorna一開始對於收留難民持保留意見，佢坦言帶一個陌生人返屋企住呢個決定佢考慮咗好耐，但Tony堅持咁做，後來Lorna覺得烏克蘭局勢對普通人嚟講的確好嚴峻，所以喺佢哋急需時應該要提供幫助，最終佢同意Tony嘅做法，但估唔到呢個決定會影響佢一家。

Photo from 《The Sun》

烏克蘭美女Sofiia化妝、打扮性感等Tony下班？

Sofiia從烏克蘭首都基輔，輾轉波蘭、德國等地，終於喺5月獲得簽證，入住Tony同Lorna所住嘅屋企。Sofiia一入住，Tony就要求6歲嘅女兒搬去同3歲妹妹瞓碌架床，空出一間房畀Sofiia。

Lorna表示Sofiia無心同佢交流，平時瞓到12點先起身，朝早唔會化妝、打扮，但一到下晝5點Tony收工返屋企佢就梳頭、化妝，仲著上性感上衣。慢慢地Tony同Sofiia越走越近，Lorna指鄰居曾提醒佢發現Tony同Sofiia表現十分親密，雖然Lorna提醒自己唔好諗咁多，但最終發現佢哋真係背住佢發展感情。

Photo from 《The Sun》

Tony拋棄妻女，與Sofiia相識10日私奔

Lorna十分不滿，要求Sofiia立即離開，但Tony卻決定陪Sofiia一齊走，兩人更搬到Tony母親屋企同居。Lorna指雖然佢無同Tony結婚，但佢哋2014年就喺埋一齊，更育有2個女兒，本來家庭美滿，但Tony為咗一個僅僅認識10日嘅女人就離開佢嘅家。

Photo from 《The Sun》

Sofiia稱原配妒忌反拉近佢同Tony嘅距離，擔心影響烏克蘭難民形象

對此，Tony同Sofiia卻有另一番說法，Sofiia指佢每日等Tony回家先化妝打扮嘅講法並唔係真，佢聲稱自己完全無打算破壞Lorna嘅家庭，自己雖然有嘗試同Lorna拉近距離，但對方抱有好大戒心，並越嚟越妒忌佢同Tony相處，反而令佢同Tony關係變得親近。

Photo from 《The Sun》

Sofiia指佢擔心佢同Tony嘅故事會影響英國人對烏克蘭人嘅印象，決心要澄清佢唔係主動破壞Tony嘅家庭。而Tony就坦言佢同Sofiia係一見鍾情，因為佢識講斯洛伐克語所以可以同Sofiia交流，Sofiia會陪佢去健身，兩人一齊鍛煉又喺車度傾偈漸漸互生情愫，Tony：「我知道我哋之間發生咗一啲事，Sofiia都有同感，我哋都無法阻止呢件事。」

Photo from 《The Sun》

Tony、Sofiia坦承互相一見鍾情，將申請永久簽證定居英國

Tony表示佢同Sofiia互相吸引，但兩人從未發生任何超友誼聯繫，直到Sofiia被Lorna趕走，Tony先意識到佢唔可以放棄Sofiia，於是就同佢一齊離開Lorna嘅家。Sofiia亦承認一見到Tony就中意咗對方：「一切都發生得好快，但呢個係我哋嘅愛情故事。我知道外界會睇唔起我，但事情的確發生咗。」