【泰女星墮河案】Tangmo媽媽堅持今午進行火化！生前手機去向不明！爆料者身份依然成謎？

By Stephanie on 24 May 2022

Digital Content Writer

37歲泰國女星Tangmo今年2月意外墮海身亡，而早幾日佢嘅個人Facebook帳號突然「翻生」，仲上載咗唔少疑似係事發當日嘅照片，令案件再次受到關注！據悉，Tangmo將會於今日（24日）進行火化儀式，而最新嘅post亦表示「於儀式結束後將會公開證據」，希望能夠令Tangmo得以安息。

Photo from melonp.official@IG

個人FB帳號突然「翻生」，並上載多張船上照片！

今年2月24日，泰國女星Tangmo 與5位友人一齊登上快艇出海，但佢卻墮海意外身亡。5位證人證詞不一，導致案件疑點重重，大眾都認為事件並唔單純。事隔幾個月，案件似乎已經陷入膠著，直到星期六當日（21日），Tangmo嘅個人Facebook帳號突然「翻生」，並且上載多張於快艇上嘅照片，令網民非常震驚！

Photo from Happy Melon official FB

爆料者身份成謎？！

唔少網民都非常好奇背後出post嘅「神秘人」到底係邊個？！其實「神秘人」最初所使用嘅FB帳號係Tangmo嘅個人FB遭到刪除，隨後立刻再開咗「Happy Melon official」繼續大爆料。有網民曾經懷疑係咪Tangmo嘅家人，但Tangmo媽媽已經透過律師回應否認傳聞；而Tangmo嘅哥哥亦有於FB回應「這是我妹妹的帳號，我不知道你是誰，但如果你知道甚麼就丟出來吧！」；而網民亦正在瘋傳「神秘人」應該係現時於國外嘅Bang Jack，傳佢已獲得Tangmo 備份好嘅手機資料！

Photo from Happy Melon official FB

Photo from 泰譯聞 นักแปล กระแสไทย-ไต้หวัน FB

泰國「天才大叔」亦掌握案件證據！

另一邊廂，被稱為「天才大叔」嘅慈善家開直播時，表示案已經掌握到「Tangmo墮海案」嘅關鍵證據，並且透露案件中嘅污點證人將會逐漸將實情上載到FB。而佢亦透露咗少少案件嘅資訊，指Tangmo右邊大腿嘅傷口其實被刀割到，揚言掌握咗當地警方捏造證據嘅過程等，無論如何都希望令案件真相公諸於世！

Photo from 泰二代Vita Travel With Vita @YouTube

Photo from Twitter

經紀人主張爆料者心懷不軌？

被視為其中一位最大嫌疑人嘅經紀人Gatick指曾經收到過「神秘人」利用Tangmo身前LINE帳戶嘅視像電話，並於媒體面前接通電話，發現對方居然播放Tangmo過往自拍嘅影片，而且衣著仲非常暴露！而Tangmo唔少圈中好友都表示收到呢位「神秘人」嘅視像電話，揚言有急事需要幫忙，但打開之後卻發現係Tangmo衣著暴露嘅視頻，令唔少人都開始質疑佢嘅真正意圖。

Photo from melonp.official@IG

然而，我哋發現Gatick所指嘅「神秘人」所用嘅FB帳號，同爆料事發當日照片所使用帳號係唔同嘅，所以兩位未必係同一個人！

Photo from FB

Tangmo手機去向不明！

儘管案件依然有好多疑問，但Tangmo 媽媽堅持於今日（24日）進行火葬儀式，其實Tangmo媽媽近來接受媒體訪問時，曾提及Tangmo手機嘅去向，指當初將手機俾咗律師，但律師早前卻表示並冇收到，導致手機去向不明！

Photo from melonp.official@IG

火葬儀式於今日下午舉行！

Tangmo火葬儀式於下午舉行，並於YouTube上全程直播，希望能夠令未能進場嘅粉絲好好送別Tangmo！場地主要以全白色為主，配上鮮花作為裝飾，而Tangmo 媽媽亦難掩哀傷心情上台致詞，願逝者安息，早日還Tangmo一個清白??而「神秘人」今晨曾表示「喺儀式結束後將會發佈重要訊息！」，然而直到截稿前都尚未發佈任何新嘅資訊。

Photo from CJConnect @YouTube

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

泰國女星Tangmo墮海案有新進展！FB突然翻生，持續更新事發當日照片？！盤點最有力嫌疑人！

23 May , 2022

37歲泰國女星Tangmo（Pataratida Pacharawirapong）今年2月24日與友人搭船出遊時意外墮海離世！然而案件疑點重重，在場嘅5位證人証詞不一，而Tangmo媽媽亦決定喺收下巨額賠償後要求大眾唔好再追查事件，令案件變得更加撲索迷離。21日，Tangmo嘅FB竟然連續出post，仲上載咗疑似係事故當日嘅照片，引發熱議！

Photo from IG@melonp.official

5位證人證詞不一，案件頓時成謎！

事故當日（2月24日）Tangmo 與經紀人、名媛、3位富豪一行6人一齊搭快艇出遊，而在場人士表示Tangmo係因為於船尾小解時意外墮海身亡，但呢個講法引起外界質疑。而警方調查時，五位證人嘅証詞不一，令大家都認為案件並不單純！

Photo from 泰國新聞

Photo from 泰國電視台

Tangmo媽媽收下700萬港幣賠償金！

起初Tangmo媽媽都對女兒意外身亡而感到失望，曾多次公開指責證人們；其後涉案嘅兩位富商Por和Robert親身致歉，並向Tangmo媽媽支付3,000萬泰銖（約7百萬港元）為賠償，令媽媽嘅態度180大轉！事後，Tangmo媽媽仲寫信要求大家唔好再調查事件，而事件亦暫吿一段落，真相始終未明！

Photo from Youtube@Thairath Online

直到星期六（21日），Tangmo嘅個人FaceBook帳號突然更新2個post，仲上載咗疑似係事發當日於快艇上拍攝嘅照片，寫上「我被一個我愛和信任的朋友傷害了」、「我哪都沒去，我仍在等5人口中的真相，如果他們不說實話，我會揭露真相，讓大家知道船上發生什麼事」，迅速引起網民們嘅熱議！

Photo from Happy Melon Patcharaveerapong FB

其後，該帳號又上載一張圖片，只見圖中嘅女生正在服藥，似乎係想暗示案件可能同藥物有關？！事隔一日，Tangmo本身嘅Facebook帳號「Happy Melon Patcharaveerapong」已經被刪除，但已經再另開設新帳號「Happy Melon Official」，而且帳號依然持續更新中！

Photo from Happy Melon Official FB

以下為大家整合一下，帳號暫時更新過嘅動態，內容令人細思極恐：

以影片形式證明當時快艇上晃動得非常厲害，即使坐喺船尾都左搖右擺，根本冇可能會選擇喺船尾小解！

Photo from Happy Melon Patcharaveerapong FB

2. 而帳號亦上載咗疑似係Tangmo身前腿部有瘀傷嘅照片，並寫上「我的腿受傷了，怎麼可能坐在船尾？」

Photo from Happy Melon Patcharaveerapong FB

3. 「Tangmo」表示事發當日佢最後一次影相係8:35pm，質疑經紀人兼好友Gatick之前所提供嘅照片證據有問題，質疑對方曾經改動過照片時間！

Photo from Happy Melon Patcharaveerapong FB

Photo from 泰國新聞

4. 「Tangmo」被5位證人指係因為坐喺船尾而導致意外墮船，但佢就大爆當時坐喺船尾嘅並非佢本人，而係佢嘅好友！

Photo from Happy Melon Patcharaveerapong FB

經理人兼好友Gatick最大嫌疑？！

現時船上嘅5位乘客都有非常大嘅嫌疑，當中「呼聲」最高嘅就係Tangmo經紀人兼好友Gatick！二人本身關係非常好，而Tangmo 仲收養咗經紀人嘅囡囡，視如己出；可見Tangmo對經紀人非常信任，而且佢前幾日更新嘅post寫上「被最信任嘅人傷害」；加上，傳Tangmo嘅遺產收益人正正係養女，亦即係Gatick囡囡，令大家都覺得Gatick嫌疑非常大

Photo from IG@melonp.official

富商Robert都有嫌疑？！

富商Robert事發當日被發現無牌駕駛船隻，而同行嘅人們亦承認有飲酒。近日，「Tangmo」更新Facebook post時就曾經上載Robert駕船嘅照片，並暗示對方曾經想邀請佢去酒店。而事發後，Robert亦有份支付Tangmo媽媽嘅賠償金，而且仲嘗試同對方媽媽保持友好關係，令大家不禁認為佢係咪因為慚愧而咁做？！