馬蹄露24歲唱《飄雪》回帶，抖音網民激讚人靚聲甜，做醜角太可惜！

生活熱話娛樂新聞

By Moon Lam on 26 May 2022

Digital Content Writer

今年54歲嘅馬蹄露以前係亞視嘅歌唱片段被ATV重新上載到抖音，估唔到片段係網上瘋傳，抖音網民讚話原來馬蹄露年輕時人靚聲甜，仲誇張咁話佢顏值秒殺一切女星！

Photo from 抖音 ATV亞洲電視

亞視不時都會係抖音重新上載以前節目嘅片段，最近就上載咗馬蹄露嘅唱歌片，本人係Facebook轉發，話：「相當值得我留念」同「我是那麼青春」！

Photo from Facebook 馬蹄露 Celine Ma

片中馬蹄露唱出陳慧嫻嘅《飄雪》，一頭長髮加上甜美聲線，獲得抖音網民大讚，有超過3.2萬個點讚！有網民話估唔到一向做醜角嘅馬蹄露後生時咁靚、唱得好好聽，仲話佢呢個顏值係依家可以秒殺一切女星！

Photo from 抖音 ATV亞洲電視

抖音 ATV亞洲電視

Photo from 抖音 ATV亞洲電視

原本想做歌手嘅馬蹄露對於網民終於留意到佢唱歌都好開心，係抖音上更用emoji逐一回應網民嘅留言。不過就有網民質疑佢嘅唱功，認為佢係預先錄好音再落場夾口型，馬蹄露就認真回應係當年係現場錄音，亞視邊會咁多資源比佢地錄完音再出黎夾口型。

Photo from 抖音 ATV亞洲電視

電視台近年亦曾經邀請過馬蹄露係節目到獻唱，網民都話雖然唱腔比較舊式，但都聽得出係唱得之人，仲有網民留言話佢其實跳舞都唔差！

Photo from Youtube 截圖

原來馬蹄露係參加新秀歌唱大賽出身，後來係1997年後期加入處境喜劇《真情》，飾演刁蠻任性嘅大小姐「May May」大獲好評，將佢嘅知名度推至巔峰，係1128集真情入面，講關於「May May」跳樓嘅一集係收視最高嘅一集！佢憑呢個角色獲得「最厭惡角色演繹獎」，從此開啟咗佢嘅醜角同萬年綠葉之路。

Photo from Youtube 截圖

佢其後拍攝《皆大歡喜》、《畢打自己人》、《鬼同你OT》等等劇集，即使做醜角都做到深入民心﹐連佢自己都曾經係訪問入面話，每做完一個醜角都會有人信以為真，進而有人攻擊佢本人，係街上亦試過被小朋友話醜，甚至有傳佢同第一任丈夫離婚都係因為佢演嘅角色太醜，可見佢嘅演技做到以假亂真。曾經被問到點解要做醜角，馬蹄露答：「總要有人演醜角」，相當敬業。