阿嬌鍾欣潼為勝出遊戲直言「我結過婚」，獲讚EQ高！靠2招瘦身成功！網民翻出減肥心得影片，卻聽得一頭霧水？！

By Stephanie on 27 May 2022

Digital Content Writer

現年41歲嘅鍾欣潼（阿嬌）最近正忙於拍攝內地真人騷《乘風破浪的姐姐3》，而節目亦已經開始播放，引起內地網民熱議。最近，節目組就釋出喺「突襲訓導室」環節中探訪練習中嘅姐姐們，仲邀請佢哋玩遊戲。期間，阿嬌喺玩遊戲期間居然毫不避忌咁講「我結過婚」，獲網民大讚EQ高！

Photo from 阿嬌微博

阿嬌過往婚姻維持大約1年多！

阿嬌過往曾與台灣「醫界王陽明」整形醫生賴弘國熱戀，喺2018年結婚分別於美國洛杉磯以及香港舉辦婚宴，大排筵席。婚後二人仲曾經夫妻檔出演內地真人騷，恩愛模樣羨煞旁人。可惜，二人於2020年宣佈離婚，結束14個月嘅婚姻！

Photo from 阿嬌IG

Photo from 《爸媽學前班》

出演內地真人騷唱歌，獲網民讚賞！

雖然阿嬌感情路似乎唔太順利，但佢北上發展後事業似乎越來越好～最近，佢同好姐妹阿Sa（蔡卓妍）一齊出演真人騷《乘風破浪的姐姐3》，節目亦剛剛開播。而阿嬌於初舞台演唱《天外來物》，唱歌表現獲網民大讚，唔少網民都希望能夠盡快睇到二人合體演出！

Photo from 《乘風破浪的姐姐3》

節目組釋出幕後花絮

節目組亦釋出幕後花絮「突襲訓導室」，喺「姐姐」們訓練期間同佢哋玩小遊戲。期間，參賽者一對一對戰玩「我有你沒有」，遊戲規則大概係要講出你曾經做過嘅事，但對方冇經歷做過嘅事，維持最耐嘅就能獲得勝利：勝出者可以用膠棒敲對方、而敗者亦可以嘗試用膠版阻擋！若果對方都有經歷過同樣嘅事情就打和～

Photo from 《乘風破浪的姐姐3》

參賽者們玩「我有你沒有」，Twins一對一對戰！

而阿Sa與阿嬌都有一對一battle，而阿Sa就表示「我在紅館開過5次演唱會。」但由於阿嬌都同佢一齊演出，所以二人並未分出勝負。阿嬌似乎唔太明白規矩，照樣攞起膠棒，要主持人提醒先得，而阿Sa就講笑咁話「她只是想打我！」

Photo from 湖南衛視芒果TV官方頻道YouTube

阿嬌坦率大喊「我結過婚」，嚇到旁人！

隨後，阿嬌又與內地歌手于文文對戰，仲一開始就立刻話「我結過婚」，令對方一時反應唔切；而在旁嘅其他人都嚇到！對手于文文亦忍唔住話「我輸得很徹底。」

Photo from 湖南衛視芒果TV官方頻道YouTube

網民大讚阿嬌EQ高！

阿嬌勇於面對過去婚姻失敗，並且於節目中公開提及，獲內地網民大讚EQ高「非常坦率！就是喜歡她這樣」、「給個讚」等，與其他藝人非常避嫌嘅態度截然不同！

Photo from 微博

Photo from IG圖片

阿嬌瘦身成功，靠2招保持身形！

上年阿嬌因為身形發福而導致備受網民熱議，但最近網民都發現佢似乎瘦身成功，狀態已經重回巔峰時期！而佢亦於微博上載預備舞台時嘅Vlog，只見佢唔單止努力唱歌練舞，仲會做運動，並且配合飲食管理，晚上只係食粟米；同大吃大喝嘅阿Sa 形成強烈對比！

Photo from 阿嬌微博

網民翻出阿嬌過往減肥心得影片，卻完全不理解？！

眼見阿嬌瘦身有成，唔少網民翻出佢分享減肥心得嘅影片，只見阿嬌話營養師曾向佢講「如果妳的磅數是一路向下的趨勢，那麼妳就會這樣向下；如果妳一直暴飲暴食、一路向上的話呢，就自然會是像這樣的趨勢。」呢番說話卻令網民們一頭霧水「有講等於沒有講」、「這不是理所當然的嗎？」等，有粉絲幫手解釋阿嬌應該係想講「瘦的人只會愈來愈瘦，而身形圓潤的就要控制飲食？！」