奶奶要求老公同病逝前女友冥婚，人妻拒絕反被罵小器：你是第三者

分手後通常都唔會再同前度有任何聯繫，不過總會有啲特別例子。台灣就有一位人妻係網上抱怨，老公有個拍咗拖14年嘅前女友病逝，但老爺奶奶竟然要老公同前女友冥婚，仲要過繼一個仔比前女友，令佢非常無奈。

Photo from 《超感應學園》劇照

台灣人妻係Facebook群組《靠北婆婆2.0》抱怨，丈夫同前女友係青梅竹馬，10歲就一齊，拍拖到24歲，後來女方選擇去偏鄉做老師，男方決定北上工作，因為對未來規劃唔同而選擇分手。但分手後兩家仍然有來往，樓主同老公結婚時前女友一家仲有黎觀禮，而老爺奶奶係樓主婚前唔知情嘅情況下將前女友認做義女，屋企仲有前女友嘅房間，甚至間唔中會黎小住，不過樓主就話前女友同丈夫無咩互動，對佢亦和顏悅色。

Photo from 《未來媽媽》劇照

樓主亦透露自從生仔後老爺奶奶仲想自己嘅小朋友認前女友做義母，樓主拒絕咗，而老爺奶奶雖然無講啲咩，但明顯對樓主不滿。樓主又補充不過前女友對自己嘅小朋友係真係好，而個仔都鍾意佢，奶奶就不斷話佢地有母子緣，唔認做義母好可惜。

Photo from 《未來媽媽》劇照

而去年前女友因病逝世，娘家一家都非常難過，連平日刻薄嘅大姑小姑都喊咗好耐，丈夫亦消沉咗兩個月。早排前女友嘅媽媽就黎搵樓主嘅老爺奶奶，因為佢地係道教嘅，覺得前女友未結婚就離世要放菜堂好可憐，於是老爺奶奶就同樓主老公商量比佢地冥婚，並將一個仔過繼比前女友，老公本身無信仰，但聽完竟然無反對。

Photo from 《婆婆大人》劇照

而樓主就堅決拒絕，無論係冥婚定過繼佢都唔想，但反而被老爺奶奶指責話佢肚量小（小器），奶奶仲話如果唔係樓主插足做第三者，樓主老公同前女友早就結婚。

Photo from 《兒媳記》劇照

網友紛紛表示支持樓主，希望佢可以堅持落去，亦認為樓主嘅老爺奶奶不可理喻，甚至話「可以叫公公跟她冥婚啊…讓婆婆展現一下她的大肚量。」同時亦話樓主嘅丈夫明明仲愛前女友，面對呢啲要求都覺得無問題先係最有問題。

Photo from 《未來媽媽》劇照

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）