林曉峰獲頒發惠州「最受歡迎男歌手」！獲得入行以來首個音樂獎項：會努力於歌壇發展！

By Stephanie on 09 Jun 2022

Digital Content Writer

大台與芒果TV合辦嘅歌唱節目《聲生不息》喺內地大獲好評，當中有份出演嘅香港歌手，包括：炎明熹（Gigi）、曾比特等都因此知名度急升。近日，惠洲舉辦咗《新音樂榜2022原創嘉年華》，當中有份參加節目嘅林曉峰仲獲得人生第一個音樂獎項！

Photo from 林曉峰微博

林曉峰參加《聲生不息》後，於內地人氣飆升！

現年51歲嘅林曉峰近年非常活躍於內地綜藝節目，上年就參加真人騷《披荊斬棘的哥哥》，成功吸引到唔少內地粉絲！宜家佢就有份參加節目《聲生不息》，雖然起初網民都認為佢並非歌手而唔太睇好佢。但隨住節目播出後，部份內地網民卻開始對佢改觀，仲大讚佢歌唱實力不亞於出道歌手，喺內地人氣飆升！

Photo from 《聲生不息》

獲得惠洲「最受歡迎舞台演繹男歌手」！

早前，惠洲舉辦咗《新音樂榜2022原創嘉年華》，唔少有份出演《聲生不息》嘅歌手都有份出席，當中林曉峰仲獲頒發「最受歡迎舞台演繹男歌手」！當日佢現場演唱《寂寞的男人》，直言自己一直都好鍾意唱歌，仲話「沒有想過可以在音樂頒獎禮上拿到獎，未來會有製作原創的計劃，會繼續努力在歌壇發展下去。」睇嚟將會正式以歌手身份出道喇！

Photo from 微博

網民反應兩極！

而林曉峰嘅助理亦有於微博上公開祝賀「因疫情關係，大會臨時更改場地，在現場配備受到影響下，你仍能用心演繹這首寂寞的男，不得不給你贊，果然越來越有做歌手的風範」。同時，而內地網民亦都喺微博瘋狂盛讚林曉峰；相反香港網民似乎就唔太理解「一首自己嘅歌都冇但有獎攞？！」

Photo from 微博

Photo from 連登討論區

大多都與其他人一齊推出歌曲，暫時未有個人作品！

翻查林曉峰過往嘅演藝生涯，其實佢從未試過自己一人發行歌曲。喺2013年，佢曾經同鄭伊健、陳小春、謝天華、錢嘉樂一齊推出歌曲《消失的光陰》，當時唔少網民都表示「回憶返晒嚟！」，希望「古惑仔」們能夠再次同台演出！

Photo from 《消失的光陰》MV

炎明熹（Gigi）及曾比特一齊獲得「年度榮譽新人獎」！

而有份出演《聲生不息》而人氣急升嘅炎明熹（Gigi）及曾比特就榮獲「年度榮譽新人獎」；而姚焯菲（Chantel）都獲得「年度我最喜愛新人獎」！基於疫情及工作關係，Gigi並未有到達頒獎禮現場，只能夠透過影片發表感言，不過唔少網民都對於Gigi未能獲得「女歌手獎項」而感到失望，Gigi喺內地嘅人氣似乎真係好高～