澳洲七旬婦租屋22年變業主，長期租住成密友，富豪房東離世前贈房子
Photo from DailyMall 圖片
根據外媒報導，現年75歲嘅婦人賽納（Jane Sayner）來自澳洲墨爾本嘅郊區，係農村生活咗7年，到1998年先搬返城市居住。由於係公司批發蔬果部門工作，人工低又無咩積蓄，加上脫離子女幫忙，只可以選擇租屋，結果就睇中藥劑師佩雷特（John Perrett）嘅屋，一租就租咗22年。
Photo from DailyMall 圖片
而雖然賽納係租屋，但一直當間屋係自己屋企咁，原先後院長滿一堆雜草，但係佢種咗好多植物同花卉，係佢悉心嘅打理下後院就變成後花園。連房東佩雷特都認同佢嘅做法，仲拎咗啲舊花盆比佢種嘢。
Photo from DailyMall 圖片
佩雷特係當地一位藥劑師，除咗本身工作高收入，佢仲好識得炒股，係股市獲得一大筆錢，係名符其實嘅千萬富翁。雖然佩雷特非常有錢，但佢係好傳統嘅人，而且對人都好友善。如果租客話間屋有地方需要修葺，佩雷特好快就會搵專人處理，而且佢習慣每個月按時親自上門收房租，到後來實在行動不便先改用銀行轉賬。
Photo from DailyMall 圖片
佩雷特為人節儉，本身同父親住係好普通嘅舊屋，佢係獨生子，無結婚亦無子女，自父親離世後一直都係一個人生活，所以每次收租賽納同佩雷特都會傾足成個鐘先道別，幾乎咩都會傾，賽納仲話用四年時間先勸到佩雷特換咗部舊電視，可見長久以來兩人已經變成關係好好嘅朋友。佩雷特晚年患上柏金遜症，當佢開始因腿腳不便難以煮飯時，賽納就會幫佢買烤肉等食物，之後佩雷特要住療養院，賽納都堅持每星期打比佢至少一次解悶。
Photo from DailyMall 圖片
因為佩雷特經常提到因為30年前成功係皇家墨爾本醫院完成腎臟移植手術，離世後會將遺產捐哂比醫院黎報答醫護人員，所以賽納一直深信間屋都會捐埋出去，擔心自己要被迫離開住緊嘅地方，單憑退休金唔知可以租到咩地方，自己可能要工作到80幾歲黎負擔租其他地方嘅租金。
Photo from DailyMall 圖片
但2020年3月，86歲佩雷特離世前半年，賽納突然收到佩雷特嘅電話，表示立遺囑嘅律師現正係佢隔離，需要佢嘅全名，因為佢打算將間屋無條件送比賽納！令賽納非常震驚！而係9月佩雷特不敵病魔離世，當時受疫情所限只有十個人可以出席喪禮，賽納就係其中一個，可見佢地交情幾深。
Photo from DailyMall 圖片
賽納係去年74歲退休，同年患上腸癌，但現時已經康復，亦因為佩雷特可以安心係居所養老，佢表示可以唔洗再凌晨3點起身返工。除咗賽納仲有另一位長期租客獲贈房屋，一名為佩雷特嘅雜工亦獲得不少金錢，而其餘遺產澳幣1,860萬（約1億港幣）亦照佢所講捐哂比澳洲皇家墨爾本醫院。
Photo from The Royal Melbourne Hospital
係報導出黎之後，有唔少外國網友都話佢地故事非常感人同暖心，認為好租客同好房東可以成為互相照料嘅朋友非常難得。網友亦留言話佩雷特根本係天使，仲有網友話係80年代已經認識佩雷特，佢係一位真正嘅紳士。
Photo from 《我親愛的朋友們》劇照
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物嘅資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
