港女花3000紋身疑皮膚發炎中晒伏！紋身師拒退錢，回應惹眾怒

By Jennifer on 14 Jun 2022

Digital Editor

今晚食乜餸：小二，嚟一碟花生！

香港有唔少人都會紋身，有啲更會自行設計圖案，希望可以留下獨一無二嘅紋身。不過紋身如果遇到一啲唔專業嘅紋身師，影響可以好大！日前有女士花費$3,000元紋身，圖案化線不特止，更疑導致佢皮膚發炎，而涉事紋身師拒絕賠錢之餘，其回應更令好多網民大感無語！

Photo from Facebook群組「香港紋身關注組

花3000元紋身5小時，甩色化線兼皮膚發炎

早前喺Facebook群組「香港紋身關注組」有網友發文稱自己喺腳上紋身花咗$3,000，足足整咗五個鐘：「上色過程非常煎熬」，佢指當時紋完個圖案已經化線，紋身師稱之後會變好，事主無經驗下信以為真，點知隨住時間過去，圖案甩色化線嘅問題越嚟越嚴重。

Photo from Facebook群組「香港紋身關注組

除咗化線，事主皮膚更敏感發炎，需要求醫治理，醫生指有紋身對皮膚造成好大傷害，更有疤痕同埋增生，過咗幾個月都未好返。事主稱佢要睇醫生，即使好返都仲要搵其他紋身師補色或作後續處理，花費遠超原本嘅紋身價。

Photo from Facebook群組「香港紋身關注組

事主其後於網上發現有同一位紋身師嘅其他客人都有類似經歷，唔少苦主紋完身後圖案都出現甩色化線嘅問題，事主決定搵該紋身師理論以及商討賠償。

Photo from Facebook群組「香港紋身關注組

紋身師指從未自稱係紋身師，承認「紋衰咗好多人」

紋身師指佢嘅紋身技術可以從佢公開嘅作品相見到，佢聲稱：「我甚至無自稱過係紋身師，紋唔紋得過係你哋嘅判斷」，但事主指該紋身師喺IG post caption曾經hashtag「#hktatooartist」，質疑佢話無自稱過係紋身師呢種講法。

Photo from Facebook群組「香港紋身關注組

喺對話中紋身師多次提及佢未曾自稱係紋身師，事主嬲爆：「話自己唔係紋身師將責任推返俾客人，話紋唔紋得過係客嘅判斷，做紋身然後衰咗先話自己唔係紋身師呢下好癲喎」，涉事紋身師又坦承唔止事主一個苦主，仲懺悔：「除咗道歉同吸取教訓外我都唔知可以點」、「我欠你哋嘅莫講話係錢，係用一生都還唔晒」。

Photo from Facebook群組「香港紋身關注組

紋身師拒絕賠錢：「唔紋衰都紋衰咗」

但事主一提到退錢，涉事紋身師即刻拒絕，佢指一旦退錢畀事主就無理由唔退埋畀其他人，稱若個個苦主都要求退錢嘅話就超出佢能力範圍，仲直言：「唔紋衰都紋衰咗，說話唔講都講咗，依家退錢都於是無補」，令好多網友大鬧佢嘅言論好無賴！

Photo from Facebook群組「香港紋身關注組

紋身師又指自己除咗做好下個作品、盡量唔好重覆錯誤令苦主嘅皮膚白白犧牲之外唔知仲可以做咩，佢表示：「我對你哋嘅情況都係深表遺憾同埋同情，亦都衷心希望任何人都唔好再遇到咁不幸嘅事」，被網友斥佢只係得把口，講埋晒啲風涼說話，有網友喺涉事紋身師IG post下面留言叫佢唔好害人，獲紋身師回覆：「你情我願點為之害人？我有逼佢搵我紋？」